十二月十三，中國國民黨主席朱立倫呼籲政府tio̍h盡速恢復小三通.。十二月十六，中國國民黨召開記者會，邀集中國台商、台師代表出席，要求政府會tàng趕緊恢復小三通。中國國民黨大陸事務部主任林祖嘉質疑，蔡政府the̍h疫情作理由真無合理，因為台灣kah外國的疫情攏比中國加真嚴重。
2020年二月初十兩岸小三通會停航，是因為當時中國爆發的武漢肺炎雄蓋蓋、會hông驚，政府隨時停止武漢直飛台灣班機，禁止中國人來台灣，小三通停航，救tio̍h台灣。小三通beh恢復，原本停航的理由是m̄是消失去ah？
十二月初七，中國國務院提出「新十條」，一步一步行向開放，實際上是結束中國一直堅持的「清零政策」。政策大轉向，世界各國的專家攏預測中國的感染會爆發式增加。但是十二月十五，中國國家衛健委公布中國31個省市自治區新增加確診2,157例，ùi十二月十四起無beh koh公布無症頭感染者的數據。中國公佈到taⁿ總死亡人數5,235人，最近攏無人因為新冠肺炎死亡。若真正按呢是按怎北京、華北、東北各大都市火葬場比平時增加幾倍的量？《紐約時報》批評中國公布的數字攏暗bo̍k-bo̍k、bē信得。設使三冬前武漢肺炎抵抵開始爆發，中國若誠實報出確診kah死亡數字，三年來全世界可能bē chiah悽慘。
咱ùi發生佇中國的種種來瞭解實情：美國、德國駐中國大使館十二月十五、十六相續宣布暫停簽證業務，因為驚真濟染病的中國人會溢去in國。若確診的人數無大增加，是按怎真濟城市攏出現病院外口hiah濟人等beh看病，感冒藥發燒藥掃空空?十二月十八新聞報導，日本半導體大廠瑞薩（Renesas）電子北京廠因為傷濟員工陸續確診，已經宣布全面停工，未來一個月會進入疫情高峰。小三通beh koh通？不通！
中國流行病學專家講，ùi十二月中旬到一月中旬是第一波疫情，慢慢會升懸；第二波ùi一月下旬到二月中旬；第三波ùi二月下旬到三月中旬。會連續大流行三個月左右。中國疫情燒無停koh宣布一月初八起大解封，真濟國家嚴格防止中國人入境。十二月二八，北朝鮮宣布暫時禁止中國人入境。日本宣布，十二月三十起限制ùi中國kah香港來的直飛航班。小三通beh koh通？不通！
小三通開放，tio̍h考量離島居民的健康安全，金門kah馬祖兩縣當地攏干單有一間病院，tī小三通過程中m̄免出現真大量的確診者，tio̍h會超出病院會tàng承受的範圍。小三通beh koh通？不通！
武漢肺炎佇中國當teh大流行，咱春節小三通beh koh通。不通不通不通！