十月十六，中共總書記習近平佇20大政治報告，一開始tio̍h提起「動態清零」政策，佇疫情防控kah經濟發展攏已經取得重大積極成果，伊強調「堅持動態清零bē搖動」。Hō͘中國人民誠失望、真驚惶。
中國所講的「動態清零」tio̍h是咱講的「清零」，意思是講，發現一個傳染病確診的病例，tio̍h tī醫學收治的同時進行流行病學的調查、隔離一切有可能kah伊接觸的人員、控制病毒的擴散kah影響範圍，以減少傳播kah確診人數的一種防疫抗疫政策。武漢肺炎開始流行、疫苗猶未普遍注射進前，佇中國、香港、台灣、澳洲、紐西蘭、新加坡等真濟所在攏是實施「清零」政策，
2020年疫情爆發了後一直到今年九月，台灣mā是實施嚴格隔離kah「清零政策」，2021年傳染力真強的新冠病毒變異株Alpha kah Delta侵入台灣，本土疫情爆發的時，咱政府採取三級防疫的「軟封控」方式，連一工mā無封城。擋掉兩波攻擊。2021年九月三十至2022年一月初三為止，93工攏總有11人確診，定定歸禮拜無人確診笑講是「加零」；2021年十月初十至2022年四月二六為止198工攏總有11人不幸死亡，台灣hông謳咾是「清零模範生」。
是按怎中國人聽tioh「動態清零」會hiah呢驚惶？2020年一月二三，武漢肺炎發源地、人口1,400萬的武漢tī長時間大力掩蓋隱瞞疫情了後，為tio̍h控制疫情宣布封城，創造了世界史上蓋大規模的封城記錄。可能封了不止有心得，兩年來中國相當時行封城。Ùi小型的一棟建築物，確診者hông關佇厝內，大門釘死hō͘伊bē-tàng出來的悲慘事件，一直到歸個社區「封」死，甚至歸個城市攏「封」起來的戇代誌，不管時佇中國各所在發生，九月初四新聞報導，中國疫情升溫！已經有33個城市「封控」中，至少影響tio̍h 6,500萬人。三月二八，人口2,500萬的中國經濟、金融、交通中心—上海，因為疫情宣布封城，koh再創落封城規模世界記錄。三月二七暗上海市官方發布，ùi三月二八封城至四月初五為止，啥人想會到一封tio̍h到六月初一，超過兩個月！
十月中，中國鄭州有20萬員工的富士康工廠，聽講有人碓診可能封廠，工人煩惱若真正封廠，生活必項品有可能面臨欠缺。萬不幸hông傳染tio̍h確診，無有完善的醫療照護，會真悽慘。趁身體健康、猶會行路趕緊逃走離開工廠，聽講鄭州的交通已經封控，上好的辦法靠雙腳行路。幾十個幾百個幾千個人，按呢佇高速公路頂面行路轉去故鄉的畫面，成作世界奇觀。
平平是清零，台灣、中國差hiah濟！