強調主權那會太無聊咧?

強調主權那會太無聊咧?

 十月二七,中國國民黨總統參選人韓國瑜出席青年政策論壇,kah兩百位青年座談,有青年問伊兩遍,伊若當選總統會kah中國簽署和平協議抑?韓國瑜攏無明確回應,顚倒批評「強調主權太無聯」。第二工,伊koh針對「顧主權」向政府開砲,mài一直the̍h「顧主權」來作施政無夠力的藉口。伊批評講,我腳脊phiaⁿ敢tio̍h刻「我愛主權」,抑是面mā tio̍h刻?「無聊mà,太無聊!」韓國瑜請假環島聽人民的聲音,去到雲林的時,以「反清復明」作例,正刨倒削民進黨若抵tio̍h選舉,干單會曉強調一寡tio̍h顧主權等等空虛無實在的話。

有小可智識的人攏知影,國家構成的要素是人民、領土、主權政府kah外交能力。Chit四個要素欠任何一個,tio̍h bē tang成作一個國家。主權是國家上懸的權力,對內有決策kah執行政策的權力,對外無受任何國家或者是國際組織的控制,一個主權獨立的國家有權治理伊領土內的人民,kah制定家己的外交政策。   

上簡單的例是,一個外國人beh來咱台灣旅遊抑是辦代誌,tio̍h需要咱台灣政府hō͘伊的許可,也就是逐個所知的簽證,除非是咱允准免簽證國家的人民。中國一日到暗講台灣是中國不可分割領土的一部分,但是一個外國人干單有the̍h tio̍h中國hō͘伊的簽證,伊干單會使去中國,用伊中國的簽證無法度入來台灣,因為台灣是一個主權獨立的國家。

香港「反送中」抗議運動中,香港政府十月初,引用《緊急情況規例條例》(也就是「緊急法」)的授權,制定《禁止蒙面規例》(mā叫作「禁蒙面法」),希望按呢會tàng阻止示威者蒙面抗議、壓止暴力示威。但是法例推行以來,猶原一直出現大規模蒙面示威。十一月十八,香港高等法院頒下書面判詞,指香港政府引用「緊急法」推行「禁蒙面法」是「違憲」,而且指出「禁蒙面法」限制「超出合理所需要」。香港警方隨時宣佈暫停執行有關法例。十一月十九,《德國之音》根據北京《新華社》的報導,全國人大常委會法制工作委員會表示:「《憲法》kah《基本法》共同構成特別行政區的憲制基礎。香港特別行政區法律是m̄是符合香港《基本法》,干單會tàng由全國人大常委會作出判斷kah決定,任何其他機關攏無權作出判斷kah決定」。咱佇chia tio̍h看出香港政府無主權的悲哀!   

堂堂代表中國國民黨參選總統的韓國瑜,那會講「強調主權太無聯」咧?莫非伊想講伊是teh競選中國一個區的行政長官,親像香港的「特首」?完全bē記得伊是teh競選中華民國,一個主權獨立的國家的總統。   

心肝底無國家主權的韓國瑜,chit陣tio̍h會使包起來,免選ah!