2022年十二月二一。俄羅入侵烏克蘭beh 10個月，俄羅總統浮丁（Putin）kā chit場戰事描述作「共同悲劇」。無錯！但是伊kā爆發對敵行動的責任piaⁿ hō͘烏克蘭kah伊的盟友，m̄是俄羅tio̍h負責。當然是大錯特錯！Chit場戰爭完全是因為俄羅總統浮丁講隔壁國烏克蘭原本tio̍h是俄羅的，現此時佇烏克蘭的俄羅人受壓迫，伊beh去解救in，beh完成歷史性的統一大業，才會tī 2022年二月二四出兵侵略烏克蘭。俄羅臭彈講三工內會tàng the̍h歸個烏克蘭領土。事實是第三工烏克蘭首都Khi-hù（基輔）一場大戰，烏克蘭軍kā俄羅軍拍走。
是按怎講浮丁講「共同悲劇」無錯？2022年十二月二四，烏克蘭國防部佇官方面冊發文指出，ùi二月二四到十二月二二早起九點為止，俄羅軍已經陣亡約10萬400人，烏軍摧毀俄羅軍3,000台戰車、5,981台裝甲車、1,978門火砲系統、413台多管火箭車、212組防空系統、283隻軍機、267隻直升機、4,615台各式車輛kah油罐車、16隻艦艇、1,693隻無人機、178個特殊設備kah 653粒巡弋飛彈。Chiah-ê武器砲彈銃子開偌濟錢攏無重要，俗語話：錢koh趁to̍h有。人咧？人死去tio̍h無可能koh活。10萬400位戰死去官兵敢m̄是浮丁的同胞？In的父母白白失去心肝仔子，已經結婚生子的，in的某子tio̍h按呢失去至親的人。死無去重傷的，tio̍h拖磿半世人。Chit-ê是浮丁總統造成的俄羅悲劇！
浮丁造成烏克蘭的悲劇完全無道理，烏克蘭人民活kah誠快樂。無代無誌隔壁的強國派兵拍入來、大砲、飛彈tio̍h按呢彈來，戰死的官兵超過1萬3,000外位，in保衛家園為國陣亡無話講。2萬3,000外名無辜的人民，是按怎tio̍h佇厝裡枉死咧？Khah可惡是俄羅轟炸真濟烏克蘭的基礎建設，橋樑、發電廠、水庫，tio̍h是連民生水電攏炸歹了了。現此時，烏克蘭氣溫是攝氏零度到零下10度，無電無水beh叫in按怎過chit-ê冬天咧？Koh khah可惡的是連病院、學校、教堂mā炸炸掉。戰後beh重建敢m̄免開一大把錢？可憐的是，十二月二一，根據「世界衛生組織」（WHO）的估計，有1,000萬名烏克蘭人，可能會因為俄烏戰爭得tio̍h精神病，人數約烏克蘭總人口的四分之一，
Chit-ê雙方的悲劇是獨裁者浮丁總統一手造成的。中國的習近平主席千萬m̄-thang學俄羅的浮丁總統，講啥物隔壁國的烏克蘭原本tio̍h是俄羅的，伊beh完全歷史性的大業，煞造成兩國「共同悲劇」。等到起兵相戰，悲劇發生了，才推（the）講是對方的責任。
悲劇若會tàng避免，tio̍h mai hō͘悲劇發生！