美國時間2022年十二月初八，美國眾議院以350張支持票對80張反對票，通過2023財年國防授權法案（NDAA）。十二月十六暗，美國參議院以83票贊成對11票反對，通過2023財政年度國防授權法案。Chit-ê法案通過的總額是美金8,580億（約新台幣26兆5250億）。Chit-ê法案兩條錢kah台灣有關係：法案授權美國國務院tī 2023年至2027年5年財政年度內，提供hō͘台灣美金100億（約新台幣3,064億）免還的軍事援助，每年極加提供美金20億（約新台幣612.8億）；另外一條是授權提供台灣美金20億美（約新台幣612.8億）「外國軍事融資」（FMF）直接貸款。還款期限是12年。另外猶會tàng撥用上濟美金10億的防衛物資抑是服務hō͘台灣，koh特定台灣作主要非北約盟國，會tàng優先the̍h tio̍h美國「超額防衛物資」。
美國時間2022年十二月二三，美國總統拜登簽署國防授權法案，除了軍援以外，法案mā授權美國為台灣打造「區域應變軍備庫」（regional contingency stockpile），會tàng優先the̍h tio̍h美國超額防衛物資，而且邀請台灣海軍參加2024年環太平洋軍事演習。Khah可惜的是，5年提供hō͘台灣美金100億（約新台幣3,064億元）免還的軍事援助chit條，猶佇美國撥款委員會評估。
十二月二四，中國國台辦發言人朱鳳蓮答記者問表示，台灣是中國的台灣。台灣問題純然屬中國內政。美國「2023年國防授權法案」原本是美國國內法，公然佇台灣問題頂面講東講西，甚至包含提供hō͘中國台灣地區「軍事融資」kah賣武器hō͘台灣等內容。嚴重違反一個中國原則kah中美三個聯合公報規定，嚴重違背美方佇台灣問題頂面對中方所作的嚴肅政治承諾，嚴重干涉中國內政，向「台獨」分裂勢力發出嚴重錯誤信號，hō͘台海和平穩定造成嚴重損害。阮對che表示強烈不滿kah堅決反對。
咱mā beh對中國提出嚴重抗議，台海和平穩定變作嚴重損害的是中國惹起的，中國逐工派軍機軍艦來台灣的航空識別區kah海峽中線邊緣擾亂。台灣原本是一個寶島、無煩無惱。不幸出一個歹厝邊，一日到暗喝講無beh放棄武力拍台灣。中國以台灣bē-tàng比並得的強大軍力威脅台灣，台灣才tio̍h開足濟錢買武器，不得已kā家己武裝作一粒「刺豬島」，美國才tio̍h軍事援助台灣。其實中國khah要緊的是武漢肺炎當teh大流行，kā中國人的健康生命顧hō͘好，hō͘不幸過身的人會tàng緊緊火葬。台灣是台灣人的台灣，kah中國完全無關係，mài佇hia枵飽吵。台灣kah美國的友好關係，免你中國管！