所有的國攏kā鎖鎖起來!

 武漢肺炎傳染到全世界chiah呢悽慘,攏是因為逐個傷過大意、失覺察,責任當然是干單中國人niā-niā,全世界所有國家的頭人攏有過失。但是歸尾猶原是中國人罪上重。根據三月十五《世界日報》的報導,關係一月二三武漢「封城」,世界幾國二十二位科學家聯合完成的研究講,「武漢封城」是人類歷史上上蓋大的一個隔離事件,加上各地的緊急響應措施,hō͘中國「新冠肺炎」感染者減少七十外萬人,對遏制疫情有相當重要的作用。

 咱beh問的是,一月二三「武漢封城」進前,驚kah走離開武漢hit五百萬武漢的人咧!敢m̄是hit五百萬武漢的人hō͘全中國攏總tio̍h災,無一省一市閃有過;敢m̄是chit五百萬武漢的人到四月初二為止,hō͘全世界166國,94萬4,109例確診,4萬7,832例不幸死亡?一位佇武漢轉來的五十五歲女性台商,一下到台灣tio̍h有主動通報講伊人無爽快,伊有發燒、khú-khú嗽,喘氣無好勢幾種症頭,機場檢疫人員安排伊看醫生,第二工檢驗確診是武漢肺炎,隨時送去隔離病房治療。(二月初六出院,感謝防疫人員kah醫療團隊。)伊是台灣第一個確診的例,伊tio̍h是「武漢封城」前的一月二十,走離武漢的一位。走去別所在的人無親像台灣chiah呢頂真,m̄知一個人會傳hō͘偌濟人?想tio̍h實在會驚!

    到四月初二為止,台灣確診的有339例,其中境外移入的有291例、佔85.84%,本土的有48例、佔14.16%。而且本土確診的大部分攏kah境外移入的人有間接直接的關係,干單幾例猶未chhōe tio̍h感染源。好佳哉咱國宣布ùi臺北時間三月十九零點開始,限制全球m̄是咱國籍的人入境,大大減少境外移入外國人的確診人數,若無按呢禁止,境外入境的例m̄知beh增加偌濟!

  今仔日,禁止外國人入境m̄是干單台灣niā-niā,境外封鎖的國家有俄羅、以色列、紐西蘭、新加坡等十三國;實施境內境外攏封鎖的有義大利、法國、德國、西班牙、馬來西亞等十國;「歐盟」講啥物關掉外部邊境上無路用。義大利抵抵有疫情的時完全無管制,放hō͘義大利kah歐盟各國的人自由來來去去,義大利才會變作歐洲的武漢、歐洲的湖北,歸個歐洲才會變作今仔日chiah呢悲慘。

  今仔日台灣做誠好但是猶做無夠氣,若做到完全的封銷,無人會tàng入來,無人會tàng出去,按呢tio̍h無半個境外移人的例,好好落去追蹤醫治確診kah一寡無症頭的感染者。一個月後台灣tio̍h會平安無事,逐個健康快樂!

  全世界若攏學台灣,所有的國攏鎖鎖起來,全世界攏無koh增加境外移入的例,好好整頓國內的患者,武漢肺炎tio̍h會慢慢消失去,天下才會真正太平!