按呢,你beh kā陳其邁注幾分?

 八月十八新聞報導,「新台灣國策智庫」昨昏公佈高雄市長陳其邁就任一年民調,整體滿意度懸到71.1%,69.3%對陳其邁有好感,57.8%同意陳其邁是以拚命三郎精神teh推動市政,65.1%支持伊連任。

 咱特別關心陳市長佇武漢肺炎防治的表現相當懸,有83.5%受訪者滿意。六月十五,全國各縣市為上蓋年老、85歲以上的阿公阿媽注疫苗,凡若有事先作名冊的縣市攏誠順序,是按怎高雄市會hông上蓋謳咾?因為高雄市照「中央流行疫情指揮中心」所公佈的十大類注疫苗對象kah順序,一鄰一里一區一區事先kā名冊kah通知單攏做好勢,「中央指揮中心」一下公佈幾月幾日開始注第幾類民眾疫苗,市政府通知里辦公室隨時發通知hō͘各鄰、轉發hō͘各戶。通知單頂面寫清楚幾月幾日上午抑是下午幾點至幾點到啥物場所。無親像台北市干單通知上午抑是下午,莫怪一大陣老人透早tio̍h去排列,koh hō͘ 柯文哲市長怪講,hiah濟老人透早來排列創啥?兩個市一下比tio̍h 知影懸低差真濟。而且高雄市是台灣頭一個採用日本「宇美町」式注疫苗,tio̍h是「民眾不動,醫護動。」民眾一排一排隔開坐好勢免徙動,緊koh好勢,莫怪hông大大謳咾,真濟縣市mā緊tòe高雄市按呢做。台北市長柯文哲看了誠不平,煞講是按怎「中央指揮中心」一下公布開始注疫苗,高雄市tio̍h隨時會tàng發通知?其中一定有內線!無講,咱m̄知影柯文哲市長頭殼內底空空。

  新聞報導講,陳其邁tī八月二四市長上任tio̍h滿一年,比較伊抵抵上任100工的時,中國國民黨認為伊性地傷急,kā注43分,chit-má已經kā伊提升到60分,謳咾伊施政有夠認真,民進黨kah無黨聯盟,mā分別kā伊注99分kah70分的好成績。

  新聞報導講,高雄市桃源區明霸克露橋hō͘盧碧風颱帶來的大水沖斷去,對外交通斷絕,陳其邁市長坐直升機去勘災,而且載一寡救災物資去山裡。中國國民黨籍的高雄市議員賴文德講,「其實干單chit遍盧碧風颱,我親目看tio̍h咱陳市長親身來阮山裡有幾遍。」Chit位原住民市議員佇市議會質詢的時,開嘴tio̍h是感謝市長對原鄉的努力。伊對陳其邁市長講「阮今年的基礎建設,市長chiah呢有魄力,一遍tio̍h增加500萬,實在真感謝。」本身是中國國民黨籍的市議員賴文德對陳市長講,明年市長選舉我bē-tàng支持你陳市長,但是,我會叫我三個後生攏選hō͘你,來報答你對原鄉的疼惜。

  設使陳其邁是你的市長,你beh kā伊注幾分?  (210820)