美國時間二月初四，一隻美國戰鬥機佇美東的南Khā-lo-lâi-ná州的海岸kā一粒中國「間諜氣球」拍落來。二月初六，中國外交部官網的新聞稿講，中國外交部副部長初五「奉命代表中國政府」，向美國駐華使館負責人提出嚴正交涉。副部長謝鋒重申，中國民用無人飛艇誤入美國領空完全是因為不可抗力致使的意外、偶發事件；美國卻無beh聽阮的話，執意對抵抵beh離開美國領空的民用飛艇濫用武力，明顯反應過度，嚴重違反國際法精神kah國際慣例。
Chit粒「間諜氣球」（中國講是「無人飛艇」）聽講是ùi中國西藏起飛，經過中國，飛過日本南部進入太平洋了後，向西北方向飛去到美國的Alaska，飛落來加拿大，二月初一有人發現伊佇美國西北部的Montana州的Billings空中。
美國無tī第一時kā拍落來，美國總統hông罵kah臭頭。
咱ùi chit粒「間諜氣球」mā tio̍h謳咾中國的科技進步，一般的民航飛機上懸飛到12公里懸，軍機飛到20公里懸，chit粒「間諜氣球」飛到24公里至37公里懸.。一般觀測氣象的氣球幾點鐘tio̍h會破，chit粒「間諜氣球」會tàng擋歸禮拜，相當無簡單。
氣球咱台灣話叫作「雞管仔（ke-ku-á）」，除了本意，另外一個意思是講話傷膨風kah白賊話分bē清楚，有人聽bē落去tio̍h kā撞破雞管。咱chit-ma tio̍h來撞破中國雞管：中國講chit粒「間諜氣球」是中國民用的。舊年八月，中國的無人機一再飛來金門列島擾亂，中國mā講he是民間的，你敢愛信？第二，中國講是誤入美國領空。chit粒「間諜氣球」除了有一大排太陽能板電池供應電力以外，下面的儀器包括雷達、傳感器kah通信設備，佇中國完全會tàng遙控，無可能誤入美國領空。中國講因為不可抗力致使的意外，mā是噴雞管。
氣象學家講，佇中國kah北美之間的北太平洋區域，屬於西風。最近一段時間，佇9,000到1萬公尺高空以上的chit-ê太平洋區域，風速是每小時240公里抑是以上，佇chit-ê區域風速並無反常。中國講美國嚴重違反國際法精神kah國際慣例。2019年，中國空軍有發布一支影片，中國空軍飛行員武輝接tio̍h頂司命令，tī 10分鐘內完成殲-10C戰機裝彈起飛，而且佇指定空域用目睭看發現「戰機頂頭幾公里所在有一粒白色球形空飄物」，確定該目標是有動力的無人氣球。經指揮機構研判，認為che非常有可能是他國的超高空偵察氣球，為tio̍h消除伊對中國空防安全的威脅，隨時下令飛行員發射武器kā伊拍掉。按呢是啥物國際法精神kah國際慣例？撞（tōng）破中國的雞管！