四月初二，中國國民黨立委徐欣瑩等18人提出預算法第83條、84條修正草案，主張「刪除特別預算因緊急需要會tàng先動支部分預算」的但書條款。
預算法第83條是講：有左列情事之一時，行政院會tàng tī年度總預算外，提出特別預算包括：一、國防緊急設施抑是戰爭。二、國家經濟重大變故。三、重大災變。四、不定期抑是數年一次的重大政事。預算法第84條是講：特別預算之審議程序，準用本法關於總預算之規定。但合於前條第一款至第三款者，為tio̍h因應情勢之緊急需要，會tàng先支付其中一部分。
事實上，包含陳水扁執政時期的921大地動，馬英九執政時期的莫拉克風颱等災後重建攏是用特別預算來支應。民進黨團幹事長吳思瑤講，因為特別預算金額誠大，會tàng多年期使用，無受年度預算限制tio̍h每年進行編列。吳思瑤講，以chit遍四月初三花蓮大地動作例來講，當然會使照中國國民黨講的動用第一預備金、第二預備金，但是預備金的金額攏真細。Chit遍花蓮大地動，政府tio̍h去補強真濟橋樑kah地基，真濟工程需要動用tio̍h特別預算。
四月初三，行政院隨時公告花蓮縣是震災災區範圍而且生效，一工內主計總處tio̍h撥款3億hō͘花蓮縣政府緊急使用。若是照中國國民黨所主張kā「特別預算因緊急需要會tàng先動支部分預算」刪除掉，萬一抵tio̍h親像chit遍花蓮大地動chit款的天災地變，行政院tio̍h先趕緊編列緊急救災預算，趕送立法院開會審查、表決通過，敢免十工半個月以上才來救人救災？火燒腳後蹬ah猶無beh緊拍火，按呢延遷thōng時間，對災民來講是叫天天bē應的苦楚！Chit遍花蓮大地動，中央政府快速的撥款，tio̍h是運用特別預算、緊急預備金上好的時陣，抵抵證明前一工，中國國民黨立委提案「刪除特別預算因緊急需要會tàng先動支部分預算。」實在是亂來，因為救災無分藍綠！
中國國民黨一直質疑，行政院用特別預算是行後尾門，事實上，特別預算mā攏tio̍h經過立法院審議同意，立法委員會táng決定同意抑是m̄同意，beh那
有啥物行後尾門的代誌？按呢亂講，恐驚會堵（that）死政府應變的機制。
四月初二，審計部審計長陳瑞敏講，ùi 2001年到chit-má，政府已經有編過40個特別預算，其中一半的法源攏是用預算法第83條。編列特別預算確實需要足謹慎，但是無論按怎講，有chit-ê法源會tàng hō͘中央政府加一種編預算的方式，伊個人認為立法院m̄-thang隨便講beh刪除。
拜託中國國民黨立法委員，救命法源m̄-thang隨便刣掉！