九月二十，民眾黨立委、新竹市長參選人高虹安佇台北召開記者會講，我高虹安m̄是林智堅。我高虹安ùi細漢到大，北一女台大mài講，師大mā是榜首入去的，台大是第一名畢業，阮m̄是親像啥物中華大學夜間部，而後才tio̍h去做台大的chit個碩士來灌水。
九月二十暗，民進黨新竹市長參選人沈慧虹佇面頂面發文，指民眾黨參選人高虹安講「阮今仔日m̄是親像啥物中華大學夜間部」，chit句話hō͘伊想講那會按呢？做田的老母刻苦hō͘伊讀冊，強調「讀書、教育，是beh hō͘咱會tàng成作koh-khah好的人，會tàng kā咱所學的貢獻hō͘社會，幫助需要幫助的人，教育m̄是hō͘你成作菁英傲慢的資本！」講得誠好．
考入第一流的學校、讀好學校，是人生踏出幸運的第一步nā-ni。早前台灣每年大專聯考，攏會公佈甲、乙、丙組的狀元。咱beh問的是hiah-ê台灣上蓋傑出的人才、菁英中的菁英，路尾對社會、對國家、對人類有做啥物值得咱數念的貢獻抑無？Che比gâu讀冊、讀好學校koh khah要緊。
咱用羅一鈞作例，一個花蓮囝仔，小學讀花蓮師專附小，小學五年tio̍h因為成績優異跳級去讀花蓮縣立花崗國中，高中來台北讀建國中學數理資優班。二年讀了考入去台灣大學醫學系，人讀七年的醫學系，伊六年讀畢業。畢業了去非洲Malawi作兩年替代役醫生，幫助當地的AIDS病患者。轉來台灣了後，佇台大病院內科工作koh佇感染科受訓，伊決定作防疫醫師。此後伊猶原會轉去台大病院看診，主治AIDS病患者。2007年起，疾管署陸續派遣5名優秀的防疫醫師去美國，接受CDC的流行病調查訓練。兩年期間，hō͘伊受益誠大。2019年底佇PTT頂面看tio̍h中國有類似SARS疫情訊息，第一時間趕緊向衛服部頂司報告，衛服部隨時派三位專家去武漢實地瞭解，一方面全台灣隨時提高警戒kah防備，hō͘政府提早一大步做防疫的措施，禁止武漢飛機直飛台灣、hō͘台灣避免了疫情的衝擊。今年七月中，衛服部長陳時中辭職投入台北市長參選活動，藍白政客罵伊部長任內防疫工作「將帥無能，累死三軍。」陳時中笑笑應講：干單累壞一鈞la̍h！伊講的一鈞，tio̍h是衛服部醫療應變組副組長羅一鈞。三月三十一，中央流行疫情指揮中心指揮官陳時中出席小英之友會的時透露，羅一鈞有一暗工暗時11時40分向他請假，講伊一定tio̍h轉去厝洗衫，koh無洗tio̍h無衫thang換。陳時中講kah心頭酸，「目屎直直beh流出來。」
教育m̄是hō͘你成作菁英傲慢的資本，重要的是你為社會國家人類做啥。