新正年頭，祝逐個健康快樂是誠寶貴的一句話。想起chit兩年全世界hō͘武漢肺炎害kah[七扑八笑、害kah悽慘落魄，攏是中國的好牽拾、好致蔭，全世界至少有六億六千八百外萬人確診過、六百七十外萬人不幸.死亡。好佳哉chit中間有各種疫苗研發成功，加上有各種防疫措施，才會tàng kā疫情控制落來。Tī chit-ê大風湧中間，kah大多數國家來比咱台灣算是小輕傷，但是mā有一千六百外人不幸死亡，雖然mā有九百三十幾萬人確診過，好佳哉咱的防疫中心，各衛生機構，病院診所，海關人員，警察人員以及全國人民的共力拍拼，認真配合注疫苗，第1劑普遍率94.24%，第2劑普遍率有89.2%，第3劑（基礎加強劑）普遍率74.17%。上蓋可貴的是65歲以上的老人注第1劑的有81.9%、注第2劑的有78.1%，75歲以上的老人注第1劑的有93.5%、注第2劑的有90.6%，才有法度kā疫情災害降到上低。
真不幸的是中國kah人無仝款，堅持注家己研發成功但是效果無夠力的疫苗，而且注疫苗的比率傷低，干單直直做核酸檢驗kah封城，若是有人確診mā無藥thang醫。上蓋可惡的是當全國大流行的時，佇完全無.配套措施的情形下放手， 開放管控，開放國門hō͘中國人出國旅行去全世界放毒，中國地大人濟，各所在攏有真濟人確診，病毒tio̍h有可能變種。害全世界大緊張。因為中國無beh公布實際確診kah死亡人數，koh暗蓋病毒的種類，致使真濟國家tio̍h檢查中國飛來班機的廢水。Beh知影中國當teh流行的是叼一款的病毒？若是全世界已經流行過的病毒tio̍h khah m̄驚，若是檢查出來是新款的病毒，tio̍h 會緊張大驚。
武漢肺炎病毒ùi上起頭的Alpha、Beta一直變身，一直到Delta，非常厲害，害死真濟人，無疑誤路尾來的Omicron各種變異株koh khah厲害。Omicron BA.2 kah BA.3、BA.4、BA.5甚至美國chit陣當teh流行的XBB.1.5，攏m̄是咱早前注過三劑疫苗所管顧會到的，而且早前注過的疫苗時間已經傷久。所以咱政府鼓勵逐個，特別是六十五以上的老人、有久年病的人，緊去注上新的「次世代疫苗」。因為上起頭武漢肺炎（COVID-19）單價疫苗，像講AZ、莫德納、BNT、高端、Novavax等等，攏是針對原始武漢病毒株(簡稱「原始株」)研發製成的疫苗；次世代疫苗mā叫作「雙價疫苗」，意思是疫苗中含有2種病毒抗原，tio̍h是針對原始株kah Omicron變異株研發製成的疫苗，會tàng提供koh khah強的免疫保護力。
祝逐個健康快樂！拜託緊去注「次世代疫苗」。