Ùi 2013年起擔任天主教教宗、現年87歲的方濟各（Pope Francis）二月初接受瑞士公共廣播公司“RSI”專訪的時hông問起，烏克蘭國內當teh辯論，若是無法度戰贏，是m̄是應該投降；另外一派認為，投降會hō͘強國侵略弱國變成天公地道。對chit點教宗方濟各回應講：「我相信上蓋堅強的是hiah-ê會tàng看清局勢、為人民設想，勇敢夯白旗仔而且進行談判的人。」
咱攏知，戰爭中夯白旗仔tio̍h是向對敵投降。教宗方濟各的言論hông看作是呼籲烏克蘭投降，三月初九伊的訪問稿傳出來了後，引發各界譁起來，烏克蘭kah伊的盟國一個一個出來譴責伊。Mā引發全世界大大陣的信徒kah網友攻擊，教宗方濟各的“X”平台（早前叫作“Twitter”）mā hō͘留言灌piak去。有人質問教宗方濟各：「設使天主教會無法度對抗咱chit-ê時代上大的邪惡，顚倒kā世界講tio̍h妥協、tio̍h相信怪物的話，按呢教會猶有啥物路用？」「天父原本應該是領導眾人對抗邪惡，chit-má你卻叫逐個屈服邪惡。」
烏克蘭外交部長庫列巴佇社群平台“X”發文表示：「阮夯的是黃色kah藍色的國旗，阮永遠bē去夯別種色的旗仔。」拉脫維亞總統林克維奇斯三月初十佇社交媒體“X”發文講：「我禮拜早起的感想是：面對邪惡bē使投降，一定tio̍h kah伊鬥爭到底、kā伊拍敗，hō͘邪惡夯白旗仔投降。」德國議會國防委員會主席齊默爾曼女士大大批判講，身為一名天主教徒，伊為教宗的言論感覺見笑。「佇烏克蘭受害者夯起起白旗仔進前，教皇應該大聲而且明確呼籲殘暴的俄羅惹事者tio̍h停止所有的惡行。」歐洲議會議員拉特克歹聲嗽罵講，教宗的發言干單會tàng用「卸世眾」來形容，「伊佇烏克蘭問題頂面的立場kah伊教宗的身分真無合，完全無法度理解。」波蘭外交部長西科爾斯基刨削講：「為tio̍h平衡，鼓勵俄羅浮丁tio̍h有勇氣ùi烏克蘭撤軍按怎？和平隨時tio̍h來到，根本無需要談判。」
教宗有人尊稱作「教皇」，以chiah呢尊貴的身分，教宗方濟各無應該干單勸烏克蘭tio̍h勇敢夯白旗仔，卻對侵略者俄羅無半句譴責，會hông誤會教宗方濟各是一位主張「強的人the̍h去食」的人。
烏克蘭總統澤倫斯基二月有表示，ùi 2022年二月俄羅全面入侵以來，已經有3萬1,000名烏克蘭軍人為國犧牲，hō͘俄羅佔領的地區mā有數萬名平民死亡。澤倫斯基講，雖然我mā想beh愛和平，但是絕對bē使放棄任何領土。
按呢咱tio̍h知影，有名望的人講話tio̍h足細膩！