六月二二，《自由時報》標題寫，柯文哲講：「是中國hit方面一直beh愛我選總統」。內文講：民眾黨總統參選人柯文哲tī 2016年，台北市長任內，接受《台大醫訊》訪問，對訪問者提出敢會選總統的問題，柯文哲的回答是：「家己應該bē出來選總統，雖然中國hit方面一直beh愛我選。雖然家己可能選會tiâu，但是主要因為家己無準備，而且選總統這項代誌的目的是beh hō͘ 別人過著koh khah好的生活，我感覺家己做bē比其他的人做koh khah好。」參考伊接受訪問所講的話，外界tio̍h講柯文哲是中國授意的候選人。

六月二二下晡，柯文哲回應表示，因為選舉teh beh到ah，一定會有抹紅、抹烏的宣傳針對伊來，伊強調che是2016年九月佇《台大醫訊》頂面的訪問，伊當時是台北市長，因為舉辦雙城論壇（台北、上海）的時，一定會kah中國有一寡溝通，hit當時中國方面有問伊，以往作過台北市長的攏會想beh選總統，問伊是m̄是會想beh選總統？柯文哲表示，hit當時伊是強調伊當時作台北市長，mā bē選總統，但是外界beh按怎講，伊mā無辦法。

    咱the̍h六月二二的新聞報導kah 2016年九月佇《台大醫訊》頂面的訪問相對照，實在m̄知影，柯文哲那會講人kā伊抺烏。到底叼幾段話、叼幾句話kā伊抺烏抑是抺紅。全篇攏是柯文哲早前講的話，唯一一句是聯想：「外界tio̍h講柯文哲是中國授意的候選人。」因為柯文哲家己講：「中國hit方面一直beh愛我選。」伊chit句話，hông感覺是伊teh展講：中國hit方面真合意伊。當然會hông聯想講「柯文哲是中國授意的候選人。」Che那是啥物抺烏咧？

　　咱beh愛hō͘柯文哲知影啥物是抺烏？抺烏tio̍h是用無經過證實的言詞攻擊對手，包括造謠、中傷、醜化、歪曲事實、抑是kā部份事實添油加味素、用白賊話作人身攻擊，hō͘對方的名聲名譽kah可信性受tio̍h質疑。咱舉一個例來說明：早前有一位台北市長名叫作柯文哲，2018年三月十五暗時，佇一個“Youtuber”直播節目頂面受氣起來罵垃圾話，伊雄雄罵講，「買收名嘴tio̍h錢，無想beh開hit條錢。In tio̍h是按呢亂講，人tio̍h食飯、tio̍h愛hit號。」逐個名嘴攏tio̍h銃。Hit位柯文哲市長到taⁿ猶無講出啥物時間、啥物人佇啥物所在，開諾濟錢，收買叼一個名嘴抑是叼幾個名嘴。Hit位柯文哲市長已經落任ah，但是到今仔日猶未還台灣所有的名嘴清白。Che叫作抺烏。

　　柯文哲講人kā伊抹烏！敢有？

　　有真濟名嘴講柯文哲市長kā in抹烏！敢無？