兩千三百外年前，戰國時期秦孝公任用商鞅治理國政，接受伊變法的主張，實施一個接一個的改革，hō͘秦國行向富強，成作戰國七雄之一。秦孝公死了後，秦惠公坐位，伊原本tio̍h反對變法，加上有人密告商鞅有謀反意圖，伊tio̍h派人全力夯商鞅。商鞅走路到函谷關的時，想beh去旅館歇暗，旅館主人拒絕講：「Che是商鞅制定的法令，若hō͘身分不明的人留宿過暗，hông查tio̍h會遭受牽連受處罰。」無位thang住的商鞅吐大氣講：「Ái！家己訂的法規，kā家己害kah chit款地步！」按呢叫作「作法縛死家己」。
1566年（明嘉靖45年），廣東潮州人林道乾作海賊帶領五十外隻戰船攻打福建詔安，都督俞大猷派兵追剿，逃走，但是日後一直作海賊，1573年（明萬曆元年）受官兵追剿，走到馬來半島攻佔óa泰國灣的北大年，佇北大年建立一個規模相當大的銃炮廠，鑄造大砲kah銃枝。有一工槍膛爆炸，彈死家己。咱台灣有流傳一句俗語話「林道乾鑄銃拍家己」，意思是講一個人自作自受。
講四百外年前的故事猶原傷久。咱講一個上新的：民眾黨總統參選人柯文哲宣布，2023年七月二九beh佇一個400人的場地舉辦「KP SHOW」演唱會，七月初九，柯文哲講伊原本想beh佇「台北流行音樂中心」舉辦，無想講落任市長才3個月，台北市政府tio̍h無beh hō͘我辦，怨歎世態炎涼。人問講現任台北市長蔣萬安敢免出來講一聲？柯文哲應講，通常chit號代誌是太監tio̍h解決掉的，m̄免去到皇上hia！初九暗，台北市文化局長蔡詩萍表示，根據柯文哲市長時代台北流行音樂中心規章，2020年十二月tio̍h明確規定bē使租借hông作政治活動。所以有人笑講，柯文哲鑄銃拍家己。真好運，可能皮太厚拍無死。
2023年九月十八新聞報導，前台北市長、民眾黨總統參選人柯文哲九月十九beh佇「台北流行音樂中心」的卡夫卡餐廳舉辦「AI語音模型kah單曲發表會」，算是以另一種形式的圓夢。十八暗，台北市文化局長蔡詩萍佇面冊頂面指出，伊有kā相關規定傳hō͘柯文哲辦公室了後，「誠欣慰」，柯辦決定無beh違反規定，會koh另外chhōe場地辦AI競選歌曲發布會。台北市文化局長蔡詩萍接受訪間的時表示，想講「那會koh來」？可能是「大人（指柯文哲）」對「細項代誌」無特別注意。蔡詩萍局長真客氣，無講柯文哲前市長知法想beh犯法，犯法無成，beh koh來犯！Mā無講柯前市長人老ah，記持太差，兩個月內犯兩遍仝款的錯誤。
講柯文哲「作法縛死家己」，抑是講柯文哲「鑄銃拍家己」，攏會通。