全世界攏tehe注目的2024年台灣總統大選，一月十三完滿完成。
真抵好chit遍三位總統候選人攏bat做過院轄市長，賴清德台南市長兩任做完，柯文哲台北市長兩任做完，侯友宜新北市長第二任做一半。咱看chit遍總統大選三位市長佇三大都市的得票率：賴清德佇台南市得票第一名、第二名是侯友宜，柯文哲尾仔名，兩位的票鬥起來猶無賴清德的濟；侯友宜佇新北市得票第二名，khah輸賴清小可奇怪、柯文哲尾仔名；柯文哲佇台北市得票尾仔名tio̍h足奇怪、第一名是賴清德、第二名是侯友宜。按呢你tio̍h知影in三位市長做了好bái.。Chit遍總統大選的結果算是正常反應in的施政能力：賴清德得票上懸當選總統，侯友宜第二名，柯文哲第三名。
講tio̍h奇怪，第一奇怪是大選前的一月初十暗時，前苗栗縣長徐耀昌忽然間發表長文講出伊對藍營的失望kah凊心，而且直剖苗栗縣過去財政足艱難的時，藍營執政的時冷淡相對，民進黨上台了後伸手援助才慢慢得tio̍h改善。咱看三工後的總統大選，佇苗栗縣中國國民黨的侯友宜得上濟票，第二是民眾黨的柯文哲，民進黨的賴清德尾仔名。苗栗縣民敢有影攏無感情？
第二奇怪的是李登輝前總統卸任了後，台灣tio̍h無一個政黨執政8年了後猶會tàng繼續守tiâu政權，奇怪，chit遍民進黨是按怎會táng拍破chit-ê「8年咒語」贏tio̍h總統大選？原因是蔡英文總統拍了足在的基礎，加上正副總統候選人賴清德、蕭美琴的優秀kah拍拚以外，koh khah是因為無願意行入「一中」框殼已經是台灣人民的主流意識，歡喜行向世界做國際的一份子。
第三奇怪的是2024年一月初八，中國國民黨前黨主席、前總統馬英九接受《德國之聲》專訪的時講：「兩岸統一是台灣會tàng接受的選項」、「兩岸關係一定tio̍h相信習近平」。馬英九佇專訪中mā提起侯友宜攏是遵照伊的兩岸主張kah做法，會延續伊的兩岸政策。台灣人應該攏有聽tio̍h，是按怎選票開出來，信賴台灣的才嬴相信習近平91萬5,000票、嬴6.56%一屑屑仔niā-niā？
有一點khah遺憾的是，立法委員民進黨無過半而且變作m̄是國會第一大黨，將來施行國政，難免會有纏腳絆手的困擾，但是che tio̍h是民主，人民的決定上大。雖然tī競選期間，民進黨的王義川一個人作幾個人用，全台灣拚透透，總是無力可回天。伊煞變作不分區立委落選頭，真無采。
無管按怎，chit遍大選算是真萬幸，民進黨會tàng繼續執政，台灣tio̍h會繼續行正確的路，chhōa台灣人繼續過民主自由法治安定的日子。