Tī 2020武漢肺炎疫情中，hō͘咱上火to̍h的是WHO秘書長的發言。世界衛生組織“WHO”秘書長tī一月二三，猶koh拒絕宣布武漢肺炎病毒疫情已經構成「國際關注的公共衛生緊急事件」，五工內感染病人的ùi 800人的擴大到上萬人，拖到一月三十日才宣布。根據一月三十「路透社」消息，“WHO”秘書長譚德塞佇記者會表示，伊反對向中國採取旅行抑是貿易禁令。

　一月二八當佇北京訪問的世界衛生組織“WHO”秘書長譚德塞表示，對於美國日本韓國等國家有beh撤僑chit件代誌伊有注意tio̍h，但是伊無主張按呢做，tī目前的形勢下應該保持鎮定，無必要過過反應。伊講中國防控疫情能力有信心，主張各國撤僑。好得佳哉逐國的頭人攏kā伊的話當作「放屁」，隨人顧生命派專機去湖北載in的人轉去。咱用日本作例來講，一月二九，日本第一台專機載206名日僑轉去，發現其中有四個人發燒起嗽，一月三十，第二台專機載210名日僑轉去，發現其中有九個人發燒起嗽。Chiah-ê人若無轉去，繼續留佇武漢到底敢會有命？

　　一月三十，武漢肺炎疫情已經佇全世界確診超過7,000例，訪問北京了後的世界衛生組織“WHO”團隊轉去到日內瓦了後，謳咾北京回應疫情的能力「印象深刻」，其中秘書長譚德塞koh khah表示，北京防疫工作緊快、透明，「值得世界各國來學習」。阿娘喂，伊真正有影m̄知一月二七武漢封城進前，已經放五百萬人去全中國、甚至去全世界傳染武漢肺病？到二月初七旲起，中國境內已經有28,090例，死亡565例，全世界有二五個國家有病例，全世界確診28,362例，死亡有566例。世界各國若真正向中國學習，保證全世界的人會死了了！

    世界衛生組織“WHO”硬kā咱台灣列佇中國內底，致使意大利認定台灣是武漢肺炎疫區，不准咱的飛機去意大利載咱的旅客轉來。上可惡的是世界衛生組織“WHO”亂亂報咱台灣確診的患者有十三個。咱衛福部隨時提出抗議，in死鴨仔硬嘴pe，根本無愛插咱！二月初三中央社報導，有網友佇Change.org請願網站發起連署，要求世衛秘書長譚德塞落台，無一禮拜超過20萬人連署。

　　台灣mā有一隻細隻死鴨仔。二月初二，台北市長長柯文哲講台北市有分配tio̍h安tah武漢載轉來的台灣人的地點是「陽明山台銀宿舍」，隨時引起真濟人的攻擊。第二工，柯文哲市長講，啥物話會使講，啥物話bē使講，衛福部tio̍h kā我講清楚。你講柯文哲市長是一隻硬嘴pe的死鴨仔，伊真有可能無歡喜。伊有可能想講，伊家己是幼稚園可愛的「媽寶」，逐項tio̍h聽in媽媽按怎講。