中國國民黨副主席夏立言tī chit遍總統大選投票前三十工去中國，引起社會議論，面對民進黨要求說明，十二月十五，中國國民黨主席朱立倫接受訪問的時，批評民進黨「無抹紅tio̍h bē曉選舉」，koh講續落下去的選戰，各種抹黑、抹紅、造謠攏有可能會出現。
十二月初九，民眾黨主席柯文哲去蘆洲掃街拜票，hông問起中國國民黨副總統參選人趙少康，不滿柯文哲佇hō͘黨員的公開批內底抹紅中國國民黨。柯文哲唱講，「本來tio̍h是紅的，kā in抹紅抵好niā-niā。」咱無親像按呢。
咱講理由hō͘朱立倫主席知影，人那會kā中國國民黨抺紅？
2016年一月十六，台灣總統副總統kah立法委員選舉，三個月前的2015年十月十三，當時身為行政院陸委會主委的夏立言去廣州參訪，kah當時中國國台辦主任張志軍會面，談起兩岸領導者可能見面的機會，促成十一月初七，中國國家主席習近平kah台灣總統馬英九佇新加坡會面。明明是teh造機會，提懸中國國民黨的聲勢，企圖影響選舉。
2022年八月初二，美國眾議院議長佩洛西（Nancy Pelosi）無插北京的警告高調訪問台灣，而且kah台灣總統蔡英文見面。佩洛西旋風式佇台北訪問20點鐘離開台灣了後，八月初四，中國解放軍發動2022年規模破紀錄環台軍事演習的時，中國國民黨知會陸委會該黨副主席夏立言kah朱立倫主席的妻舅高思博應中國共產黨中央的邀請beh組團去中國，而且講有「可能」會見中國共產黨官員，無管政府苦勸講時機無適宜，in歸陣猶原tī八月初十拚去中國，講是為公職人員選舉募款。夏立言去了後，中國對台軍事演習m̄-nā無縮短，顚倒延長軍事演習時間。Che明明tio̍h是家己送上去hō͘中國的統戰素材，陸委會抨擊是「Tī軍演下曲意訪問中國，呼應對岸統戰旋律，甚至是去hō͘人呸嘴瀾佇面的行為，完全無管國內廣大民意的反對」。三個月後的十一月二十六，抵抵是台灣直轄市長、直轄市議員、縣（市）長、縣（市）議員選舉。
今年十二月十三暗，台灣總統大選進入三十工前相當敏感的時刻，中國國民黨副主席夏立言koh去中國參訪，預定十二月二十轉來，引發高度的爭議。借問中國國民黨朱立倫主席，是按怎每一遍台灣大選前，中國國民黨一定派副主席等高級黨官去中國？台灣人當然會懷疑，恁到底是去中國領「聖旨」抑是去領「銃子」？台灣人kā恁抺紅敢有kā恁枉屈？是按怎每一遍大選前，無派人去中國，中國國民黨tio̍h bē曉選舉？！講一個理由來聽。