早前有一位老先生教我啥物叫作「人道主義」：咱若看tio̍h一個人當teh受苦，無管伊是叼一國的人，伊的宗教信仰，伊的年齡，伊的性別，雖然咱kah伊完全無熟似，但是咱會ùi內心發出同情m̄甘，想beh去kā幫忙，按呢tio̍h是人道主義。Chit-ê心發展落去，看tio̍h有生命的動物tio̍h傷抑是枵餓，咱mā會發出憐憫同情的心，想beh kā伊幫忙。Chiah-ê話我一直記佇心肝底。
六月初二，新聞報導講一禮拜前佇一個座談會，一位美國留學the̍h tio̍h博士的中國學者李毅教授講，美國內戰（「南北戰爭」1861年四月十二– 1865年四月初九）hit當時美國人口3,000萬，內戰死去300萬，差不多死一成人。伊講，中國有統一的歷史傳統，秦始皇、漢武帝tio̍h是因為按呢「名垂青史」。當今中國領袖去到軍隊內底，為tio̍h「統一台灣」喝出「寧可失去千軍，mā bē使失去寸土」的口號，中國大陸有真濟人準備做出犧牲。現此時中國大陸kah台灣人口攏總有14億，為tio̍h祖國統一，準講死去1億4千萬人，是一個常態，kah美國內戰仝款而已，而且tī人類歷史上干單算是「小菜一碟」而已。
看chit-ê報導，我歸個頭殼皮攏麻起來。想看覓，1億4千萬人為tio̍h祖國統一戰死，m̄是干單一個數字，每一個生命攏是寶攏tio̍h珍惜，何況每一個攏是in父母的心肝仔子，至少有2億8千萬的父母kah 5億6千萬的阿公阿媽teh悲傷流目屎，準若攏已經結婚生一個囝仔，至少koh會有5億6千萬人teh悲傷流目屎。為tio̍h侵佔別國的土地，死hiah濟人害10幾億人悲傷流目屎敢tio̍h？
中華人民共和國自了m̄-bat管過的台灣，是按怎變作中華人民共和國不可分割神聖領土的一部分咧？中華人民共和國有叼一項會tàng誘拐台灣的？Ùi村里長、鄉鎮長、縣市長，一直到總統副總統，各級的民意代表，攏是咱台灣人家己選出來的，中國人會tàng選啥？國民所得、差台灣一大截，言論出版自由、宗教信仰自由、通信自由，人民的快樂指數，醫療水準kah全民健保，叼一項中國會tàng kah台灣比並？水準khah低的硬beh併吞水準khah懸的講號作「統一」。Khah無的講beh替khah有的謀利造福，m̄驚笑破人的嘴！
李毅教授講，為tio̍h祖國統一，犧牲1億4千萬人干單算是「小菜一碟」而已。2,300外年前中國學者孟子講；「惻隱之心，人皆有之；無惻隱之心，非人也。」意思是講同情憐憫的心，每一個人攏有，若是無同情憐憫的心，m̄是人。
為tio̍h無影無跡的統一，講出「m是人」講的話。可憐啊！