十一月初四下晡，中國國民黨佇台北市政府前廣場舉辦萬人造勢活動，馬英九前總統致詞講，民進黨執政7年外實在是做了傷過差。伊講伊bat作過台北市長mā bat作過總統，一個政府會tàng做kah chiah呢差mā無簡單。
敢按呢？人講數字會講話，咱來聽數字按怎講。
中央政府chit幾年財政總決算，中國國民黨馬英九政府執政八年，年年紅字，負債累累。上好的2015年負債100億，上差的2018年負債2,141億。民進黨蔡英文政府執政七年外，逐年都有chhun錢，上差的2017年抵抵接馬政府2016年負債442億，干單chhun 25億，上好的2022年chhun 4,964億。
馬英九前總統執政8年，經濟成長平均2.8％，比全球平均的3.3％ khah低。蔡英文總統執政七年外，台灣ùi 2019年開始，經濟成長率超過3%，雖然疫情當嚴重，但是台灣經濟表現足súi氣，2020到2021年，經濟成長率ùi 3.39%衝到6.53%。馬英九前總統執政8年台灣經濟是亞洲上尾名，學者比較馬英九前總統執政8年，kah蔡英文總統執政7年外，經濟完全無法度相比。
咱來看出口kah外銷訂單的數據統計tio̍h足清楚：馬英九前總統執政的2008年3,517.3億美金，一直到2016年4,445.4億美金。蔡英文總統執政的最近2年2021至2022年衝破6,741億美金，出口數字逐年升懸，舊年（2022年）咱全國對外貿易，已經超過9,000億美金，比馬英九前總統2016年交hō͘蔡英文總統的成績成長70%，人講按呢叫作:「台灣產業嚇嚇叫！」
馬英九前總統任內8年，台灣失業率上懸是2009年5.85%，上低是2015年3.78%，蔡英文總統執政到目前七年外，台灣失業率上懸是2021年3.95％，上低是2019年是3.64%。
馬英九前總統執政的前四年，台灣股市一直佇7、8,000點gô來gô去，致使2012年拚連任的時，bat作過馬政府經濟部長的尹啟銘大聲喝，請逐個支持馬英九總統，伊若連任成功，台灣股市tio̍h會peh上一萬點。馬英九前總統連任成功，但是攏m̄-bat上一萬點，上好的2014年封關是8,972.5點。有真濟人怪尹啟銘烏白開支票。尹啟銘解說講：選馬英九台灣股市會上一萬點，是一種選舉語言。蔡英文總統無講啥物選舉語言騙選票，執政第二年的2017年封關，台灣股市tio̍h上一萬點，2023年十二月二八封關，台灣股市是17,930.81點。
馬英九前總統講：一個政府beh做kah chiah呢差mā無簡單。原來伊是teh講伊家己。