十二月初四，中國國民黨正、副總統參選人侯友宜、趙少康kah競辦組織部副召集人謝龍介，去到台南市七股區關心光電、爐碴問題，而且簽署「反不當種電的連署書」。侯友宜講，伊看tio̍h好好田、魚塭攏hông用來種電，台南美麗的土地、生態攏hông破壞了了，完全攏無考慮農漁民的生計，而且會造成熱島效應，少年人想beh轉去故鄉拍拚，攏看bē tio̍h機會kah希望。
Hit暗，台南市政府tio̍h表示，「M̄-thang為tio̍h政治目的一再犯錯而且錯kah傷離譜！」2019年三月，麻豆文旦當teh開花猶未結果，謝龍介bat亂講有200萬斤文旦hông hiat-sak佇曾文溪埔、koh有拍影片，「顚倒是非」。Chit遍kā鹽灘地講作漁電共生案場，「攏是濫糝講」！台南市政府mā有製作「太陽光電敢會造成熱島效應？」「敢有影真濟好好田hông用來種電？」等光電小知識圖卡，澄清謠言m̄是事實，請m̄-thang聽信！「熱島效應」是指都市比周圍地區溫度khah懸的現象，台灣太陽光電板面積並無達到都市規模，m̄是傳言所講的。而且好好田mā bē hông用來種電，根據2020年七月修正的「農業主管機關同意農業用地變更使用審查作業要點」規定，限制特定農業區kah養殖漁業生產區内，攏bē使變更設置光電。
有關中國國民黨總統參選人侯友宜講「光電板會造成熱島效應」、「破壞生態」。十二月初五，民進黨總統參選人賴清德反擊講，光電產業無分藍綠執政攏是國家政策，光電bē帶來熱島效應、bē影響降雨量，mā bē造成登革熱，che是基本的科學常識。一個總統參選人「應該有基本的科學常識」，任何候選人都bē使為tio̍h選舉利益刁工kā台南市、光電產業「貼標仔」。
十二月初五，台南市長黃偉哲對chit點直唱，侯友宜「無常識koh m̄讀冊」，根本是「超越韓國瑜的大草包」。黃市長講了差一點仔、無夠氣。咱聽劉家昌按怎講：
六月十四早起，一向支持中國國民黨的資深音樂人劉家昌佇面冊發文表示，伊家己看了侯友宜佇政治大學kah學生的答辯了後，才徹底瞭解，侯友宜「M̄-nā是一個草包，伊草包內底連一枝草都無」、「人問東伊應西、離譜到盡磅，烏白亂講」。劉家昌講，面對台腳大學生的提問，侯友宜的應答那像「初中生」的程度，事後學生kā侯友宜注56分無及格。劉家昌認為按呢算是「足忠厚」ah。
真濟人猶m̄知影侯友宜是草包！Koh khah m̄知影侯友宜是一個內底連一枝草都無的草包！