二月十四下晡，鴻海創辦人郭台銘kah立法院前院長王金平會面了後，接受媒體訪問的時表示，可能四年前伊年輕氣盛，一時的衝動，才會去退出中國國民黨。年輕氣盛，是講人有khah少年，血氣khah旺。做代誌khah倉皇（chhong-pōng）。奇怪，那會教bē會，四年後郭董仝款hiah呢年輕氣盛。
咱m̄敢隨便講民眾黨主席柯文哲是老狐狸，但是小狐狸伊絕對擔當會起。郭董全台灣走透透，辦過幾場大型暗會，五月初十，佇澎湖造勢了後，暗時十點趕轉來台北求見柯文哲主席，來到厝裡，柯主席第一句話tio̍h講：「你連國民黨的遊戲規則都m̄知，tio̍h去參加比賽！」第二工，柯主席透露，郭董kā伊講，中國國民黨徵召伊的可能性有80%。郭董猶原年輕氣盛！
五月初一，郭台銘佇高雄講會tàng佇「半屏山設核電站，安全發電保證賺錢」，hông罵kah臭頭，第二工緊會失禮，猶m̄願煞去，伊講：「設使小型能源體積干單有十分之一，又koh真安全，是m̄是每一個縣市攏tio̍h去chhōe安全的核融合的電廠？」伊真正m̄驚新北市長侯友宜問伊：核廢料beh囥叼去？
五月初一，郭董佇高雄演講的時講，beh tī 三年內kā機器人產業做起來，派8萬機器人抵抗共軍的入侵。郭董的機器人產品，目前是上海A股上市的「工業富聯」製造的。咱先mài講鴻海機器人是m̄是有戰鬥力，咱先問郭董，中國那會允准你kā上海製造的機器人運來台灣，kah中國解放軍相戰？設使中國允准你運8萬機器人來台灣，佇台灣的機器人敢m̄是攏會受tio̍h中國控制？Beh按怎相戰？郭董已經m̄是年輕氣盛的問題，是敢有發燒？
四月二二，郭董表示，對岸有真濟軍機擾亂台灣，是針對民進黨「務實台獨工作者」。咱愛和平，相信對岸mā是愛和平，in的軍隊mā無願意相戰，人民mā無願意相戰。所以只要國民黨、甚至伊郭台銘當選，軍機tio̍h bē koh來，「因為我不獨、你不武，阮tio̍h是中華民國」，只要中華民國國旗夯懸懸，唱中華民國國歌，「我感覺in tio̍h bē來」。小停咧！咱知影1958年八月二三下晡6點30分，中國人民解放軍開始砲拍金門，「八二三砲戰」開始，一直拍到1979年才正式停戰。咱國傷亡官兵有2,661人。中共砲拍金門hit當時的執政者是中國國民黨的蔣介石總統，上蓋反對台灣獨立。是按怎若換中國國民黨執政抑是郭董作總統，中國解放軍tio̍h bē 拍台灣？郭董講chiah-ê話已經比年輕氣盛koh khah少年，差不多是五歲囝仔講的話。
郭董hông騙兩遍，愈騙愈年輕。M̄知當時仔郭台銘才會轉大人？