四月二六，《遠見雜誌》刊登聯合國發布2023年「世界幸福報告」，台灣排名第27，比日本、韓國、中國khah懸，佇亞洲排佇第四名。一個國家的「幸福感」，kah國家的財力並無直接關係。幸福的重要關鍵因素，包括身心健康、人際關係、收入kah就業、品德kah美德、社會支持、個人選擇自由、有效能koh清廉的政府。其中社會支持是指，一旦若抵tio̍h困難的時，有人會出手幫忙我。美德是指肯幫忙有困難的人。土耳其大地動、日本大地動、中國四川大地動，咱敢kah叼一位災民有熟似？無。咱是按怎會捐錢、捐物資，甚至派救難隊趕去救災？因為人道主義的想法是：佇世界上若猶有一個人teh受苦，tio̍h那親像咱家己teh受苦。台灣人tio̍h是因為有chit種關心別人、歡喜幫助別人的美德，正是台灣人有幸福感的原因之一。
新聞報導，十一月初六暗時，民眾黨總統參選人柯文哲出席高雄大學政治交匯演講。Kah大學生對談的時，透露伊早前作台北市長的時，上蓋討厭的是啥物？每遍出車厄，像講啥物普悠瑪事故、地動等災難的時，tio̍h捐一個月的薪水。台灣天災地變koh hiah呢濟，「我也無貪污，我beh那有hiah濟錢通捐咧？逐遍若beh捐一個月薪水，我tio̍h真受氣。」看tio̍h chit-ê報導，真正hō͘咱大大驚一tiô。
想起2018年二月初六半暝11點50分，花蓮發生規模6.2級的地動，嚴重kah有幾棟大樓東倒西歪。兩工後的二月初八，當時身為台北市長的柯文哲佇面冊按呢講：地動會tàng kā建築物震倒去，但是震bē倒台灣人的團結。你看柯文哲市長何等的氣魄！柯市長佇面冊頂面講，花蓮是人間淨土，我逐遍去到hia，心靈攏會得tio̍h平靜，chit遍強震造成了嚴重的損害，我會捐出一個月的薪水，mā希望逐個做夥來贊助，幫助鼓勵災民度過難關，mā幫助花蓮重新徛起來.。M̄-nā按呢，柯文哲市長mā專工kā賑災捐款專戶寫佇下面，方便逐個寄錢。當時的台北市長柯文哲實在有夠讚，真正值得人尊敬！
問題是，今仔日的柯文哲kah五年前2018年的柯文哲，到底叼一位才是真正的柯文哲？若是今仔日beh選總統的柯文哲才是真正的柯文哲，咱beh苦勸柯文哲去讀古早古早孟子講的一句話：「人皆有不忍人之心。」意思是講每一個人攏有惻隱疼惜別人的心。下面接落去講：「無惻隱之心，非人也。」意思是講無惻隱疼惜別人的心的，m̄是人。
真假柯文哲，叼一位是本尊？