2024年總統副總統大選，有幾位候選人真愛表演空氣銃拍天。有聽tio̍h銃聲以外，那像啥都無。幾個人中間，那像無人會tàng kah趙少康比並。
2024年一月初七，中國國民黨副總統候選人趙少康主動透過媒體向中國國台辦喝聲：「請國台辦轉告解放軍有關部門，chhun一禮拜台灣tio̍h beh選舉，mài koh來海峽中線附近，請恁hō͘台灣海峽保持和平，hō͘選舉保持平和，逐工按呢來hō͘台灣人民壓力，阮選舉chiah呢重要，請mài koh來ah。」
可能台灣離中國大陸傷遠，趙少康空銃拍天，中國攏無聽tio̍h、抑是雖然有聽tio̍h，根本無愛插伊。
一月初七至初八，中國派出9隻次軍機（其中1隻「運8」反潛機進入台灣西南空域）；4台次軍艦佇台海周邊活動；3粒空飄氣球，超越海峽中線。初八至初九，中國派出10隻次軍機（其中2隻「殲16」戰機進入台灣西南空域）；4台次軍艦佇台海周邊活動；4粒空飄氣球（其中2粒飄過台灣本島上空）。初九至初十，中國派出8隻次軍機（其中1隻超越海峽中線）；5台次軍艦，佇臺海周邊活動；1粒空飄氣球超越海峽中線。初十至十一，中國派出15隻次軍機（其中1隻「運8」反潛機、1隻「運9」通信對抗機進入西南空域）；4台次軍艦佇台海周邊活動；3粒空飄氣球（其中1粒飄越台北上空）。十一至十二，中國派出10隻次軍機（其中有2隻超越海峽中線kah北部、西南空域）；6台次軍艦佇台海周邊活動；5粒空飄氣球。十二至十三，中國派出8隻次軍機（其中1隻進入西南空域）；6台次軍艦佇台海周邊活動；3粒空飄氣球。十三至十四，中國派出4台次軍艦佇台海周邊活動；1粒空飄氣球。算算一下，chit禮拜中國攏總派出60隻次軍機，33台次軍艦，20粒空飄氣球。
Hō͘咱想起2023年十二月初十，中國國民黨副總統候選人趙少康接受訪問的時，強調tio̍h強化兩岸互信對話。伊講，中國國民黨反對台獨的立場，mā要求大陸互相表示善意，以台灣人上蓋驚的戰爭來講，戰機mài超越過海峽中線kah來踅台灣，才bē kā台灣舞kah逐個真驚惶。伊進一步講，同時，大陸面對台灣第一線的東部戰區，飛彈、兵源tio̍h會tàng減少，而且tio̍h允准台灣派軍事觀察員常駐觀察，以確保台灣安全kah大陸軍事bē對台灣構成威脅，雖然對岸是m̄是同意咱m̄知，但是國民黨的基本立場明確，希望互相表達善意。
好佳哉，趙少康落選，那無，等伊就任副總統了後，才知影伊的話根本是空銃拍天。Beh知tioh傷慢ah！ (240202)