罷韓thīn韓,行出來tio̍h知輸嬴!

  高雄市罷韓團體自六月tio̍h申請十二月二一beh舉辦「罷韓大遊行」,不准駁回,七月koh申請koh不准駁回,八月koh申請、九月koh申請,十月koh申請才批准。In tio̍h積極落去計畫、籌備。無疑誤,由韓國瑜陣營申請舉辦的「1221南方崛起、高雄光榮週年慶大遊行」mā beh tī十二月二一舉行,十二初五申請三工後tio̍h批准。Che明明是teh sńg對戕(tùi-chhiâng),有人形容講是「火車相撞」,真危險的代誌!連「美國在台協會」(AITto̍h通知佇台灣的美國人,十二月二一hitm̄-thang去高雄。真濟人攏想無,代理市長葉匡時kah高雄市警察局長李永癸到底teh想啥?那會驚?

      Khah驚的是警政署長陳家欽,因為內政部強調,警政署一定會全力維護社會秩序,保障chit遍集會遊行活動的安全,絕對無容允任何以暴力來妨害意見表達的行為發生。陳家欽署長親身落去高雄指揮,高雄市警察局要求中央提供警力的協助,警政署調援上千警力,高雄市警當日有動員超過2,000名警力,捷運高雄車站、左營高鐵站、美麗島站,是警方列為作上有可能發生衝突的「熱區」。今仔日兩個遊行會tàng圓滿和平完成,tio̍h特別感謝警方的辛苦。

   Thīn韓的隊伍下晡一點十一分ùi凹仔底(lap-á-té)森林公園出發,三點外到終點微笑公園,中國國民黨總統候選人韓國瑜、副總統候選人張善政攏有向群眾致詞,in家己講有三十萬人,若照電視畫面來看極加bē超過十萬人。韓國瑜市長並無全程參加,干單有頭kah有尾niā-niā。

  罷韓的隊伍下晡兩點才ùi文化中心出發,分作We Care、台灣基進、thīn香港、美麗島、彩虹、lap紅色媒體、公民割草kah溜之大吉等九個大隊一直行到六點才行到終點大義倉庫,發言人尹立、公民割草行動發言人李醫師、台灣基進黨新聞輿情部副主任張博洋kah高雄氣爆自救會會長陳冠榮,罷韓四君子上台感謝參與遊行的民眾,向逐個行禮了,講遊行的終點,tio̍h是罷韓的起點,尹立報告十二月二五韓國瑜市長滿一年,第二工咱tio̍h beh罷韓連署書,群眾大聲歡呼!In家己講今仔日參加遊行的群眾超過五十萬人。長長的綠色布旗頂面寫四字白字「光復高雄」,那像是長長的「光復高雄大道」,看tio̍h無頭無尾、烏khâm-khâm的人,相信有hiah濟人。因為經驗,對「韓粉」會驚,所以有呼籲參與遊行的民眾加入LINE平安網,會記得「拒絕挑釁、防備栽贓、零衝突、mài插伊」四原則。

  罷韓thīn韓,m̄免相諍(chìⁿ),行出來tio̍h知輸嬴!