十月十六，中國共產黨第二十次全國代表大會佇北京人民大會堂正式開幕，中共總書記習近平發表二十大政治報告，伊講中國beh行向叼去，抑是伊決定beh作萬年永久的皇帝，攏是in兜的代誌kah咱無關係，咱無必要插伊。但是伊烏白亂講tio̍h台灣的部分，咱tio̍h一點一點kā伊彈倒轉去。
習近平講「祖國完全統一一定tio̍h實現」。失禮，in中國老歲仔國才有啥物「祖國」，in beh kah啥人去統一，是in兜的代誌，kah咱台灣無值事（tī-tāi）。咱青春少年的台灣無啥物「祖國」，咱干單有「母國」，咱兩千三百萬粒蕃薯仔子母親的名叫台灣。
習近平講：「解決台灣問題是中國人家己的代誌，tio̍h由中國人來決定！」咱台灣人過民主、自由、有人權、有尊嚴的生活，那有啥問題？「台灣問題」是in中國講的。台灣準若是有問題，mā是台灣人家己的代誌，咱台灣人當然會家己解決，那tio̍h勞煩厝邊的中國來頭殼疼？1949年十月初一，中華人民共和國建國以來到taⁿ，連一天都m̄-bat統治過台灣，一人一家代，公媽隨人chhāi。對台灣來講，中國是kah台灣完全無關係的外國。那會講：「解決台灣問題是中國人家己的代誌」咧？習近平人好好，那會頭殼hiah無清楚，會講「台灣問題tio̍h由中國人來決定」咧？Che那像講；中國問題，tio̍h由蒙古人來決定；抑是講：葡萄牙問題，tio̍h由西班牙人來決定，啥人聽tio̍h mā知影完全無道理。Chit種完全無道理、無常識的話，習近平那講會出嘴？
習近平講「堅決反對台獨分裂行徑，堅決反對外部勢力干涉。」台灣自了m̄-bat kah中華人民共和國做夥過，是beh按怎「分裂」出去？到今仔日為止，唯一「外部勢力干涉」台灣，是ùi中國來的。咱台灣人當然堅決反對。
習近平講「阮堅持用上大的誠意，盡上大的努力爭取和平統一的前景，但是絕對無承諾放棄使用武力，保留採取一切必要措施的選項。」Che tio̍h那像一個人看合意厝邊的厝，愛kah流涎（nōa）。伊tio̍h kā厝邊講，你chit間厝我一定beh愛，我堅持用上大的誠意，會盡上大的努力好好仔kah你講，但是絕對無承諾無beh夯刀夯銃，會保留採取一切必要用搶用刣用拍的選項。若照基督教（包括天主教、基督教、東正教），伊斯蘭教（mā叫作回教），猶太教各大宗教所遵守的《十戒》，第十戒講：「M̄-thang貪你的厝邊的厝；mā m̄-thang貪你的厝邊的某、奴僕、女婢、牛、驢，以及你的厝邊一切所有的。」按呢咱tio̍h知影，中國習近平貪伊的厝邊的台灣，是逆天的作法，天理不容！