十月二二，中國官方媒體《環球時報》引述消息報導，稅務部門近期依法對富士康集團，佇廣東、江蘇的重點企業進行稅務稽查，自然資源部門對富士康佇河南、湖北的重點企業用地情況，進行現場調查。
十月二三暗，財經專家謝金河佇面冊講，中共對富士康全面查稅的消息，拜一消息傳出了後hō͘全球金融市場大tio̍h驚，國際媒體相爭報導，「佇上海股市上市的工業富聯開盤tio̍h跌停，而且一價到底，股價跋1.62人民幣，市值蒸發321億人民幣，台灣的鴻海跋3元，股價面臨100元保衞戰，chit工，歸個鴻海集團市值至少折損超過2,000億新台幣，che是對郭董誠有殺傷力的一工。」
中國那會按呢kā修理？今年八月二八，郭台銘宣布參選總統的時，回應媒體提問，設使中共若因為你郭台銘無聽話，tio̍h beh kā鴻海的財產沒收，你beh按怎？郭台銘看起來那像誠有霸氣，應講「Yes、Please，若是中共無拍台灣，我會使重新做模仔工人，我bē-tàng聽伊（中共）的指派，我自了m̄-bat受中共的控制，你來拍我，沒收我的財產，我猶原無受威脅。」郭台銘根本是teh講囝仔話。中國看郭台銘真正teh拚beh選總統，而且十月十九副手賴佩霞佇面冊宣布已經正式the̍h tio̍h喪失美國國籍證書，中國tio̍h出手kā伊修理。
日本《產經新聞》台北支局長Yaita Akio（矢板明夫）加減詼講，chit遍郭台銘kah中共的互動，那親像「中國東北的m̄成囝仔teh冤家相拍」。A講：「你看啥？」B講：「看你，是按怎？」A講：「好膽koh看一遍看māi！」B講：「看tio̍h看是按怎！」基本上到chit-ê時陣，兩旁tio̍h會開始起腳動手，搧嘴phóe、舂腹肚，結果大概雙方攏有tio̍h傷，無人拍嬴。
政論家汪浩直剖講：「Chit-má中共來查水表，郭董已經24點鐘恬恬m̄敢出聲！Chit種人講beh kah習近平談和平協議？Khah早睏khah有眠！」
謝金河講，「中共嚴查富士康，是m̄是beh hō͘郭董知難而退，加入整合藍白的行列。中共嚴查富士康另外一個意涵是台商mā是佇共同富裕之列。Chit遍查稅，富士康可能mā-tio̍h親像阿里巴巴、騰訊，交出一大筆資金才會煞。」
聽講鴻海佇中國的企業富士康hō͘中國查水表，民進黨賴清德講：我希望咱全國民眾應該tio̍h支持鴻海、支持台灣的企業。平平是chit遍總統參選人，中國國民黨的候友宜kah民眾黨的柯文哲，恬chiⁿ-chiⁿ乖kah那貓仔咧！
中國若看人bē爽tio̍h beh出手拍人，郭台銘干單出一枝嘴假勇。兩個攏假那m̄成囝仔！