七月十七，鴻海集團創辦人郭台銘投書美國《華盛頓郵報》指出，台灣kah中國之間，過去佇「一中各表」的「九二共識」之下，真濟年來對各領域議題進行了有成效的協商，mā達成了會tàng運作的交流，但是tī 2016年蔡英文當選總統了後，中國以蔡英文拒絕接受北京kā台灣看作中國一部分的解釋作理由，終止兩岸對話，到taⁿ猶未恢復。郭台銘指出，事實上，hō͘執政的民進黨看作眼中釘，the̍h掉才會歡喜的「九二共識」，tī過去30年內已經促進了兩岸之間歸百萬遍的互訪、大規模投資kah雙向貿易、經濟增長、每禮拜幾百班次的直航航班， hō͘緊張局勢緩和落來，想beh放棄「一中各表」框架來kah中國談判，結果干單會加強戰爭威脅，hō͘台灣佇國際上進一步hông孤立，損害台灣的經濟，因為戰爭危險kā投資者嚇驚走去，hō͘全世界攏認為台灣真無安全。郭台銘表示，伊長期主張隨時恢復台灣kah中國之間的直接兩岸談判，che是緩解緊張局勢、維護台灣民主、自由kah法治的唯一途徑，真正有效的談判，無應該hō͘選舉kah權力利益破壞，試圖beh利用美中對抗來得tio̍h好處，絕對是算bē合，koh khah無可能取代真正有效的談判，tio̍h現實面對影響台灣未來上蓋大的因素「中國」，持續對話kah協商。郭台銘認為，佇chit款的框架下面，台灣有夠額的空間充分保護伊的民主、自由kah生活方式，上重要的是，按呢會tàng chhōe tio̍h一條會kā雙方ùi絕壁邊giú轉來的道路。
過去30年，兩岸關係那像有khah緩和，但是m̄-thang bē記得，幾十年來中國一再強調，會盡最大的努力尋求和平統一的前景，但是絕對不容忍任何分裂國家的台獨行徑，絕對無接受佇國際上舞「兩個中國」抑是「一中一台」。中國干單有「一中」。「一中各表的九二共識」，中國自了m̄-bat接受過，民進黨mā m̄-bat接受過，現在kah將來，mā無hit號啥物「一中各表的九二共識」。2022年十月十六，中共總書記習近平佇二十大開幕式發表政治報告的時表示，解決台灣問題是中國人家己的代誌，tio̍h由中國人來決定。中共堅持以最大誠意、盡最大努力爭取和平統一的前景，但是絕對不承諾放棄使用武力。伊強調，「祖國完全統一一定beh實現，mā一定會實現！」習近平的智囊學者鄭永年講，「M̄是台灣beh統一抑是m̄的問題，實際上是啥物時陣統一，用叼一種方式統一的問題。」
郭台銘家己講4冬前退黨是「年輕氣盛、一時衝動」，看伊最近的投書內容，kah年輕氣盛無關係，那像是一個人含眠teh講戇話。