八月二八，鴻海集團創辦人郭台銘宣布beh投入2024總統大選，而且正式展開連署，伊強調講，伊的參選是為tio̍h促成在野陣營的整合，「在野若無整合，hō͘賴清德傷過好食睏」。郭台銘mā講大聲話，伊beh hō͘台灣tī 20年內超越新加坡，成作亞洲人均GDP上懸的「亞洲第一好額」。
郭台銘宣布beh參選總統，無人感覺意外。Hō͘人感覺意外的是：郭台銘是按怎到taⁿ猶未轉大人？咱那會按呢講。
八月二三，鴻海集團創辦人郭台銘出席「主流民意大聯盟」金門場，致詞的時宣布，伊beh投入2,000萬美金成立「金門和平倡議基金會」，推動創設「兩岸和平協商辦公室」，以民間立場推動兩岸以和平為目的的會談，以及模仿
未來推動兩岸和平協商。
對chit點，有黨政人士表示，郭台銘有夠天真，kah中國共產黨談和平協商，干單會以悲劇收場。咱攏知影，「天真」的意思是講一個人個性純真自然、無虛偽，抑是講一個人頭腦簡單，khah濟是講細漢囝仔，講郭台銘假那囝仔。
1951年五月二三，中國強迫西藏佇北京簽訂《中央人民政府kah西藏地方政府關於和平解放西藏辦法的協議》（簡稱《十七條協議》），保證西藏六十年bē變。但是換來的卻是中國tī 1959、1989、2008三遍血腥鎮壓西藏，其中1989 hit遍是是由當時擔任中共西藏黨委書記的前中國國家主席胡錦濤下令鎮壓的。簽訂和平協議hit當時郭台銘才抵抵出世七個外月，大漢了後koh無愛讀歷史，真有可能m̄知chit段歷史，m̄知影中國共產黨的話bē信得。
咱講一段郭台銘大漢了後會曉看報紙看電視hit陣的代誌，伊應該足清楚。1984年十二月十九，由中國國務院總理趙紫陽kah英國首相瑪格麗特‧柴契爾作為兩國政府首腦佇北京簽訂《中英聯合聲明》，列出1997年七月初一香港歸還中國了後，中華人民共和國對香港的基本方針，佇「一國兩制」的原則下，中華人民共和國政府會確保伊社會主義制度bē佇香港特別行政區實行，香港本身的資本主義制度kah生活方式維持「五十年不變」，保障人身、言論、出版、集會、結社、旅行、遷徙、通信、罷工、選擇職業kah學術研究以及宗教信仰等各項權利kah自由。請郭台銘講良心話，1997年七月初一到taⁿ二六年，香港有變無？中國共產黨敢有照呼照行？
咱講兩段歷史，tio̍h是beh提醒郭台銘董事長，中國共產黨的話bē信得。希望郭董事長早一日清醒起來，mài koh天真。真正會tàng轉大人。