台灣俗語話講：「飯會使隨便食，話bē使隨便講。」事實上「話bē使隨便講」完全正確。但是「飯會使隨便食」tio̍h小可說明。家己抑是kah親友同事做夥食飯無問題，抑是各種社團做夥食飯mā無問題。但是政府官員抑是民議代表kah生理人做夥食飯，有可能會踏tio̍h紅線，khah老練的政府官員抑是khah正派的民議代表，攏知影kah生理人的飯局tio̍h愛有技巧去閃開。
2023年間，台北市警察局編列「監視錄影系統傳輸網路服務費」預算，原預算是5.5億，後來市議會警政衛生委員會發現，原合約費率比公告一般費率khah懸9,000萬，tio̍h kā預算刣作4.5億。業者chhōe中國國民黨籍陳重文議員關說(koan-soat)，交烏紗錢近千萬，希望陳議員質詢的時幫忙giú懸預算。
三月十四，台北地檢署指揮廉政署搜索陳重文的北市議會辦公室等26所在，依牽涉犯tio̍h貪污治罪條例之違背職務、受賄等罪嫌，約談陳重文、李慶煌等9名被告，以及助理等5名證人；三月十五透早5點外，檢方考量無扣tio̍h贓款，改依圖利、財產來源不明罪，kā陳重文聲押禁見。
有人發現柯文哲市長落任前佇公文寫講「財團勾結議會，榨取國家財產，惡形惡狀必須遏止。」Kā藍、綠、白三黨市議員攏拖落水。引起民進黨政策會執行長王義川受氣，三月二五公開質問柯文哲kah 4名民眾黨市議員，敢bat kah陳重文、台智光食過飯？若是有，tio̍h公開時間、地點kah吃飯的結論。
三月二九，台北市議員簡舒培表示：Chit禮拜kah王義川做夥開記者會了後，王義川對蔣萬安有三問、對柯文哲有三問、對民眾黨議會黨團的4個議員有一問，問講恁是m̄是bat kah台智光做夥食飯？結果民眾黨、議員kah柯文哲完全無回應，koh講無愛tòe王義川佇hiah隨風起浪，意思是講王義川亂講。簡舒培議員講，今日早起接tio̍h一個深嚨喉kā我piak料，講是由民眾黨立委giú民眾黨市議員去立法院，tī二月kah台智光做夥食飯。民眾黨立法委員黃國昌是民眾黨的總召，對chit項代誌敢無掌握？你bat講chit-ê廠商是糞埽廠商，請問民眾黨立委到底有去giú市議員kah台智光chit-ê糞埽廠商食飯抑無？
三月二九早起，民眾黨主席柯文哲接受訪問的時直剖，轉去看民進黨kah台智光食偌濟飯，伊koh補一句「我頂遍mā kah蔡英文食飯。」柯文哲感嘆講，che tio̍h是含沙射影、穿鑿附會；意思是人烏白講beh陷害in。
一個黨主席kah總統食飯，4個市議員kah廠商食飯，無仝款！民進黨若有kah台智光食偌濟飯，柯文哲tio̍h講！飯bē使隨便kah人食，話bē使隨便講！