三月二七中晝，馬英九前總統飛去中國，伊家己講是「祭祖和平之旅」，che是兩岸分治74年來，頭一個中華民國卸任總統去中國。伊的祭祖行程預定12工，先飛上海，而後去南京、武漢、長沙、重慶kah上海等城市。伊猶未出發先轟動，中國的網民出聲歡迎講：「馬娘娘來了！」「臭乞食來ah」「伊來騙食騙飲騙雞卵！」中國國民黨有夠衰，hō͘伊連累hông罵作「百年爛黨」。
三月二八，馬英九頭一個行程是去南京中山陵，伊有提起國父孫中山創建民國，發表公開致詞mā有提起中華民國。但是中國中央電視台發布的新聞相片kah影音畫面，干單留伊的題字kah姓名，其他攏總剪掉。落款寫「百十二．三．廿八」，連「民國」兩字都m̄敢寫，mā hông剪剪掉。參觀中山陵，馬英九的致詞講：兩岸人民仝款屬中華民族，攏是炎黃子孫。伊最後提出「和平奮鬥、振興中華」的目標，深深向望兩岸共同努力，追求和平、避免戰爭，致力振興中華。che是兩岸中國人bē-tàng閃避的責任，咱一定tio̍h努力實現。
真失禮，三月二一，台灣民意基金會發表三月台灣人民族認同民調報告，發現：78%認為家己是台灣人，7.7%認為家己是中國人。另外9.1%認為家己是台灣人mā是中國人。第三種人咱mài kā計算。咱一定愛提醒馬英九kah中國人，事實上今仔日佇台灣認為家己是中國人的干單7.7% niā-niā，78%佔大多數的人認為家己是台灣人，ka恁中國人beh創啥無關係，mài kā阮拖拖落去！
三月二八下晡，馬英九去參訪「中國近代史遺址博物館」，he是早前中國國民黨時代中華民國政府佇南京的總統府。Bat作過中國國民黨主席、中華民國總統的馬英九，若猶有一點點仔自尊心、知見笑，應該閃開、避免去hit款所在，伊去參觀hit款所在明明tio̍h是捧屎抹面，卸世卸眾。
三月三十，馬英九前總統參訪中國武漢市檔案館，大大謳咾中國防疫成果無大幅向外擴張，是「對人類的貢獻」。咱攏知影2000年一月二三，武漢開始封城進前，一大陣人tio̍h走離武漢，走去全中國每一個角落，一大陣人走去廣州、香港，轉飛去全世界各所在，真緊全中國無一個省市自治區無tio̍h災，武漢肺炎真緊tio̍h湠到全世界各國。到今年四月初四為止，全世界有tio̍h過武漢肺炎的人超過6億7,664萬，死亡人數超過686萬，猶無算經濟發展kah人民生活所受tio̍h的悲慘影響，chiah-ê攏是中國武漢的好牽拾。到今仔日猶有真濟機構teh追查，武漢肺炎有可能發生的起源地—武漢實驗室。馬英九大大謳咾中國防疫成果無大幅向外擴張，是「對人類的貢獻」。實在卸世眾！