十月初二早起新聞報導，馬英九前總統不滿民進黨政府kā雙十國慶叫作“Taiwan National Day”，翻譯作漢文tio̍h是「台灣國慶日」，伊認為che是十足的「台獨」路線，伊佇面冊頂面發文質問，國名tāng時仔改作台灣？「中華民國」拍m̄見去ah。所以伊拒絕出席今年的國慶大會。
馬英九佇面冊按呢講：過去咱政府自了m̄-bat使用“Taiwan National Day”chit-ê英文名稱，憲法kah政府文書攏無變更國名，國慶大會tio̍h應該繼續使用「中華民國國慶日」英文“Republic of China National Day”才tio̍h。使用「臺灣國慶日」，除了偷渡臺獨，敢猶有任何實質的意義？蔡英文總統佇任內最後一遍的國慶大會，猶原做出傷害中華民國的代誌，hō͘人非常痛心。
伊講，我舊年有公開呼籲蔡英文總統kah籌辦國慶大會的立法院游錫堃院長，mài koh用“Taiwan National Day”（臺灣國慶日）作國慶的英文名稱，可惜in準作無聽tio̍h，今年猶原仝款。既然苦勸無效，我認為今年若koh再出席「臺灣國慶日」典禮，那像是為chit款旋（se̍h）彎、偷渡的「臺獨」路線背書，目睭金金看民進黨政府危害臺灣安全、傷害中華民國，所以我決定拒絕出席今年的國慶大會。我beh向國人kah世界講，為tio̍h臺灣的安全，子孫的福祉，阮bē-tàng恬恬無出聲，tio̍h堅定kah「臺獨」路線切割，堅決反對臺獨！
對chit點，行政院長陳建仁問講 ùi 2021年tio̍h開始使用“Taiwan National Day”，chit幾年mā攏是按呢，前年（chûn-nî）、舊年，伊攏有來參加。Bē-tàng理解是按怎今年忽然間無beh參加？
Khah奇怪的是，十月初二下晡馬英九出席一個公開活動，記者問伊永年攏有參加國慶大會，是按怎今年無beh參加？伊應講：「Che是國家機密。」
1949年五月二十起，中國國民黨政府佇臺灣實施戒嚴，到1987年七月十五解除戒嚴令為止，攏總有戒嚴世界久的38年56工。Tī chit-ê期間有bē算得濟的台灣人，tio̍h是背（phāiⁿ）tio̍h「洩漏國家機密罪」hông掠去苦刑、關監，甚至砰掉。Mā hō͘咱想起蘇聯時代俄羅的一個政治笑話，有一個人佇莫斯科紅色廣場大聲罵蘇聯頭人：「布里滋湼夫是一個白癡！」伊隨時hông掠去，經過刑求拷打，一個月後，法院判決hit-ê人21年的刑期，其中的1年是：「侮辱國家元首罪」，另外的20年是：「洩漏國家機密罪」。
馬英九前總統今年無愛去參加國慶大會，伊個人的自由。伊那會講kah國家機密去咧？咱khah好奇的是馬英九的國家機密是啥物碗糕？