四月二六，立法院會針對國會改革上演表決大戰，民進黨立法院黨團提出變更議程，kā民進黨團版國會改革法案ùi委員會抽出來，直接進入二讀，不過佇中國國民黨團席次優勢、kah民眾黨立委不參與表決情形之下，民進黨的提

案hông封殺。佇表決過程中，民進黨立委范雲不滿立委自律、反性騷等條文直接進入二讀遭受tio̍h阻撓，質問不參與投票的民眾黨團總召黃國昌「為啥物beh幫助中國國民黨？」黃國昌聽了超級大聲phǹg-phǹg叫：「我有欠妳o͘h？」

　無，民眾黨團總召黃國昌無欠民進黨范雲。伊是欠選民。

本屆立法委員，民進黨51席，中國國民黨52席，民眾黨8席，無黨籍2席徛中國國民黨，中國國民黨會tàng掌握54票，所以表決抑是選舉的時，民眾黨若恬恬、無支持叼一旁、攏無作為，變作是暗中支持中國國民黨。

　　Chit遍m̄是民眾黨佇立法院的第一件傑作。

　　一月底，民眾黨有說明立法院長選舉投票的意向，民眾黨團經過8名不分區立委當選人討論，一致決議推舉黃珊珊競選立法院長，koh呼籲兩大黨共同支持黃珊珊。確實有表現出一個政黨的風格。二月初二，立法院長選舉無人過半數，tio̍h隨時舉辦立法院長二輪投票。無疑誤佇立法院長第二輪投票的時，無看tio̍h民眾黨8席立委的影。Chiah呢要緊的投票，8位民眾黨立委到底去叼位？事後有消息傳出講「In第二輪投票無出現，做夥走出去食中晝飯。」按呢mā算是暗中支持中國國民黨提名的院長侯選人韓國瑜、副院長侯選人江啟臣。

　　民眾黨立法委員若繼續變chit種把戲，kah柴頭尪仔有啥物無仝？Hō͘咱想起第二次阿片戰爭。1856年十月初八，兩廣總督葉名琛（thim）扣押一台講是佇英國註冊的「箭」號船，koh kā船員鐐銬起來。引起起了第二次阿片戰爭。十月二三，英國艦隊炮擊而且占領了接近廣州的珠江炮台，koh繼續轟炸廣州城。十二月十五，廣州發生騷亂，歐洲商業地產hông放火燒。英法聯軍攻破廣州城，活掠總督葉名琛去英國軍艦，kā伊載去到印度加爾各答關到死。英法聯軍破廣州城以後，上北拍到天津，訂天津條約，拍入北京城訂北京條約。賠錢以外，割讓九龍半島hō͘英國；割讓外東北hō͘俄羅。Hit-ê葉名琛總督有留落一個好名聲:「六不總督」—不戰不和不守，不死不降不走。今仔日的民眾黨佇立法院的表現若是採取：不贊成不反對，不投票不棄權，不死不走，有可能會留落「六不政黨」的好名聲。Bē輸柴頭尪仔的民眾黨立法委員，選出一身tio̍h傷濟ah，何必選kah八身，浪費hiah濟人民血汗錢所納的稅金，無彩！