八月初七，美國《華爾街日報》專題報導講：外國人不願來ah，是中國經濟發展上新的挑戰。報導講，疫情解封而且koh重新開放邊境半年了後，去中國的國際旅客真少。《華爾街日報》認為，che是中國kah西方國家愈行愈遠的一個現象，可能會tī一段真長的時間造成負面的影響。佇北京、上海等大都市無看tio̍h外國旅客的人影特別明顯，ùi全國範圍來看，今年第一季旅行社入境旅遊接待人次干單有5萬2,000人，2019年第一季入境旅遊接待有370萬人次。張家界國家公園今年到5月中旬，海外遊客人數干單2萬5,600人，2019年前5個月的海外遊客人數是50萬人。Kah往（éng）年仝款，其中有將近一半的遊客是ùi台灣、香港kah澳門來的，m̄是úi美國抑是歐洲國家來的。
外國遊客閃開中國的一個重要原因，是中國kah西方的關係繼續惡化，che mā hō͘ in想beh去中國旅行會koh khah謹慎。美國政府6月份有發布一份旅行警示，警告美國人若beh去中國旅行tio̍h重新考慮，理由是美國政府所講的中國「隨意執法」，包括出境禁令kah無正當拘留的可能性。美國一位商業顧問講，設使是我原本所熟似的中國，我會koh去！但是chit-má，中國那像真正kā家己扮演作一個非常反西方、特別是反美國的國家。Che hō͘我真不安。」
中國政府偏偏ti今年七月初一發布「中國反間諜法」，那像當年愚戇的中國國民黨政府所講的「匪諜就在你身邊」，kā所有的人攏準作間諜，包括外國觀光客，活beh hông驚死！中國那像一個大「老鼠當仔」（niá-chhí-tng-á），外國遊客若犯tio̍h「中國反間諜法」，會tàng入去、bē-tàng出來.。你隨便錄音錄影翕相、你隨便畫地圖、你kah中國人談論香港台灣新疆西藏，是啥物企圖？台灣人koh khah tio̍h小心，你佇台灣bat佇網路頂面無管是面冊抑是Twitter批評過中國抑無？若有，中國tio̍h會kā你準作「間諜」辦！ 中國政府呼籲全民共同加入反間防諜的鬥爭，去中國的人政治風險大大升懸。
外國人無愛去中國旅遊mā影響tio̍h外商投資。2022年第一季是美金1,000億，2023年第一季外國對中國直接投資落到chhun美金200億。中國表面上歡迎外國企業去中國投資，但是中國政府定定暗中以拜訪調查等手段，對佇中國的外國企業施壓。真濟個美商日商的員工受tio̍h干擾甚至拘留，有外國員工申請beh轉去故鄉，mā受tio̍h百般刁難。已經有一大堆外國企業撤離中國，目前猶有27%投資者考慮beh走離中國，外資撤出量有新台幣970億左右。
講tio̍h中國，鬼mā驚。Siáng愛去中國ah？