正月初二暗，民進黨推出「阮做夥，佇路ni̍h」的影片，頭起先是蔡英文駛車，賴清德坐佇副駕駛座，8年來蔡總統車駛kah誠在、台灣一直行佇正確的路ni̍h、時間到tio̍h交hō͘經驗豐富的人來繼續駛落去，蔡英文kā車鎖匙交hō͘賴清德，對賴清德kah坐佇副駕駛座的簫美琴講，按呢我tio̍h真放心。Che mā是運用「惜花連盆」的心理，beh kā 8,170,231個蔡英文粉絲呼出來，提醒當年疼惜蔡英文的人今年tio̍h仝款來疼惜賴清德。Chit枝影片超過一千萬人看過，真濟人謳咾。但是總統大選結果，民進黨賴清德才the̍h 5,586,019票、40.05%，嬴中國國民黨侯友宜才914,998票、6.56% niā-niā，可見「惜花連盆」的效果無完全發揮出來，真在真無彩。
選前佇一個談話性政論節目頂面，幾位名嘴teh談論「阮做夥，佇路ni̍h」chit枝影片。政論家李正皓講一個「阮做夥，佇路ni̍h」的變奏曲：中國國家主席習近平teh駛車，坐佇副駕駛座的是2013年至2023年擔任中國國務院總理的李克強，tī 2023年三月hō͘習近平趕落車，仝年十月二七佇上海過身，才六十八歲。Chit-má坐佇副駕座的是新上任的國務院總理李強，開嘴問講：我敢會使坐後壁？主持人問講，che是啥物刊物登的？李正皓應講我抵抵想的。
中國國民黨前發言人蕭敬嚴講，伊mā抵抵想出一個「阮做夥，佇路ni̍h」的變奏曲：侯友宜teh駛車，副駕駛座坐的趙少康，tio̍h是chit遍中國國民黨提名的總統、副總統候選人，後座坐的是中國國民黨主席朱立倫。佇頭前的兩個人細聲參詳講，咱tio̍h想辦法kā坐佇後面hit-ê人踢落車。公開講chit種故事，蕭敬嚴無hông開除黨籍，真佳哉！
受tio̍h「阮做夥，佇路ni̍h」chit枝影片的影響，中國官方媒體《新華社》看了目孔赤，趕緊推出山寨版，一月初七半暝刊出專文「永遠佇路ni̍h」——以習近平同志作核心的黨中央引chhōa全面嚴格治黨向縱深推進。網路頂面隨時有人反應講：永遠佇路ni̍h代表無目標、無終點，想tio̍h會hông驚。Mā有人講：永遠佇路ni̍h，駕駛過頭疲勞，真有可能會出車厄。
有真好膽的中國網民佇網路頂面發表一張漫畫：中國國家主席習近平teh駛車，副駕駛座坐的mā是習近平，後座坐三個人mā攏是習近平。原來「高手佇民間」chit句話m̄是假的。
咱期待有koh khah濟人發揮無窮想像力，創造出精彩的「阮做夥，佇路ni̍h」的變奏曲。Hō͘ 逐個笑笑、歡喜一下。