八月十六新聞報導，中國政府以美國聯邦眾議院議長Phe-lo-si（Nancy Pelosi）訪問台灣作藉口，對台灣發動大規模文攻武嚇。中國解放軍佇台灣周圍6個海空域進行實彈射擊軍事演習，中國駐美大使秦剛佇美國發動宣傳戰，佇“Twitter”頂面發文，八月初四佇《華盛頓郵報》投書講台灣主權是中國的，指責Phe-lo-si訪問台灣是「違背美國無beh kah台灣發展官方關係的承諾。」
咱台灣的駐美代表蕭美琴積極應戰。八月初五至十一，七工內接受包括CBS新聞網、美國公共電視台、微軟國家廣播公司、CNN kah Fox新聞等美國五間主要媒體專訪，向美國各界人士說明目前台海局勢，台灣政府政策kah立場，駁斥中國對台主權謬論，爭取國際輿論支持。
八月十六，中共中央台辦發言人宣佈對一批「台獨頑固分子」實施制裁，有蕭美琴、顧立雄、蔡其昌、柯建銘、林飛帆、陳椒華、王定宇等七個人。
想起美國聯邦眾議院議長Phe-lo-si訪問台灣轉去美國了後，中國政府隨時宣布制裁Phe-lo-si全家。伊的孫仔加減ge中國、問阿媽講，「中國kā咱制裁，是m̄是beh刪除TikTok帳號？但是我根本m̄-bat用過TikTok！」
美國制裁香港官員才會hông驚。美國制裁包括香港特首林鄭月娥在內十一位官員，封鎖直接抑是間接佇美國持有的房產kah權益，bē-tàng使用kah美國相關銀行的信用卡。禁止chiah-ê官員kah美國人抑是佇美國境內做生理，無法度做任何kah美國基金、貨品、服務的買賣，bē-tàng有美國入境簽證。
中國講beh制裁Phe-lo-si，現時旅居美國的1989年學運領袖王丹kā中國裝siáu，講提供4項制裁hō͘ Phe-lo-si hō͘中國參考：第一「禁止Phe-lo-si佇河南省村鎮銀行存款。」最近河南省村鎮銀行倒數，不准存款人去領錢；第二「禁止Phe-lo-si佇唐山市半暝出門去食宵夜。」六月初十半暝，唐山市一間烘肉店，有一個男子beh性騷擾一位女性顧客無成，見笑轉受氣出手拍人。第三「禁止Phe-lo-si佇中國貸款買爛尾樓。」2020年中國政府限制建商貸款，銀行決定抽走建商銀根，真濟房地產開發商出現違約。中國政府拒絕為tio̍h猶未完工的爛尾樓付款買厝的民眾房屋貸款，有超過240萬戶，合計約新台幣11.09兆。第四「禁止Phe-lo-si去徐州探視鐵鍊女。」2022年一月徐州鎖鏈女虐待事件，牽涉多次人口販運案件，有一名精神異常hông囚禁的女子有生育八個囝仔的悲劇。王丹問講以上4項制裁，Phe-lo-si會驚抑bē？！
中國的制裁極加是，不准你去中國、香港kah奧門。啥人會驚？