蔡英文總統chhōa團展開10天的「民主同伴共榮之旅」，回程過境美國洛杉磯，美西時間四月初五早起kah美國眾議院議長麥卡錫會談。四月初七，蔡英文總統轉來到台灣。第二工，中國tio̍h佇台灣周邊進行三工大規模軍演。那像舊年（2022）八月初二初三美國聯邦眾議院議長裴洛西（Nancy Pelosi）chhōa真濟位美國國會重量級議員來台灣訪問。轉去的第二工，中國佇台灣四箍圍拍飛彈。猶koh有逐個足熟似的中國軍機軍艦，三五台、十外台、甚至有時有幾十台，來咱台灣西南旁的航空識別區、kah台灣海峽中線附近擾亂，會使講是曠（làng）時無曠日。Che tio̍h是用武的來恐嚇威脅咱台灣。
有時，中國會改換一個無仝的方式，用文的來誘拐欺騙咱台灣。
馬英九前總統去中國「祭祖和平之旅」的途中，三月二八，國台辦主任宋濤專工去江蘇省昆山市kah馬英九前總統、台企、台青座談。有人問講：「兩岸統一有啥好處？」宋濤講只要佇「一個中國原則」框架下面，台灣同胞希望得到啥物攏會使參詳。三月二九，國台辦發言人朱鳳蓮，佇一個例行記者會頂面進一步講，「統一了後，台灣同胞會tàng享受tio̍h實實在在的好處。」
朱鳳蓮講：「統一了後，台灣會tàng實行kah大陸無仝的社會制度。佇確保國家主權、安全、發展利益的前提下，台灣同胞的社會制度kah生活方式等攏會得tio̍h充分的尊重，台灣同胞的私人財產、宗教信仰、合法權益攏會得tio̍h充分保障。台灣的財政收入攏總會使用佇改善民生。」
朱鳳蓮講統一了後，台灣人會得tio̍h的好處，台灣人chit-má tio̍h是按呢，那tio̍h等到統一？真抵好伊講chiah-ê mā攏是中國所無的。Beh講m̄-tio̍h講一寡中國有的、咱台灣現時無的，而且足期待、足向望有的，像講目前咱台灣「人均所得」是美金32,811元，伊若講統一了後，台灣會tàng kah中國仝款「人均所得」美金5,000元。有人聽tio̍h錢目睭tio̍h金起來，加減有誘惑性。可惜朱鳳蓮講bē出嘴，因為目前中國「人均所得」美金12,741元，是台灣的38.9%，「人均所得」全國第1名的北京市是美金25,789元，是台灣的78.6%。
朱鳳蓮講：「統一了後，台灣的財政收入攏總會使用佇改善民生。」伊無講明，事實上伊是暗示統一了後，台灣無必要開hiah濟錢買軍火買武器。伊敢m̄知影：Tio̍h是有中國chit-ê歹厝邊，一日到暗派軍機軍艦來亂台灣，koh講無beh放棄用武力解決台灣，台灣才需要開hiah濟錢買軍火買武器！
放心，台灣人hông哄（háⁿ）bē驚！hông騙bē行！