十月初七，巴勒斯坦激進組織哈瑪斯（Hamas），宣稱tī兩點鐘內ùi加薩走廊向以色列發射5,000粒火箭，以色列遭受tio̍h半世紀以來上大的攻擊事件，哈馬斯銃手突破色列畫定的緩衝區kah安全圍欄，ùi海陸空進入以色列南部，佇27個地點進行閃電式的攻擊，siàu kah看tio̍h人tio̍h掃射銃殺的程度。
十月初七透早，50名哈瑪斯銃手ùi天頂降落，突襲加薩地區週邊、以色列的沙漠地區當teh舉辦一場有幾千人參加的音樂節。哈瑪斯看tio̍h人tio̍h開銃，死無去走bē離hō͘哈瑪斯掠去150人作人質的有真濟名外國人，哈瑪斯有可能用手內的人質威脅以色列。第二工佇音樂會現場有發現tio̍h 260具屍體。
十月初七早起，有超過70名哈瑪斯武裝份子侵入倚近加薩走廊的一個猶太人屯墾區卡法阿札，對當地居民進行大屠殺，現場發現大約200具以色列人的遺體，包含40具嬰幼兒的屍體，有的嬰幼兒的頭hông鏨掉。
十月初七，以色列發布「戰爭狀態警報」，針對哈瑪斯的攻擊，以色列國防部長強調，in犯了嚴重錯誤。以色列總理Ne-tân-yá-hu誓言beh對加薩走廊發動報復性反擊。到十月十一為止，雙方有超過2,400人死亡、有7,500人受傷。
十月初七，以色列國防軍開始大規模集結兵力，徵召後備役軍人展開反擊，國難當頭，以色列預備役人員紛紛響應號召，前總理班奈特mā加入預備役行列。到十月初十以色列後備軍動員人數已經達到36萬。
十月初八新聞報導，卅一歲的阿夫拉哈米已經佇美國紐約生活四年，伊講伊家己真幸運，某kah七個月大的查某子攏免受暴力侵犯，但是國難當前，伊tio̍h隨時khoán好行李，買「單chōa機票」，初八tio̍h會到一個基地報到。
英國《BBC》記者先飛去賽普勒斯，無想講前往以色列的機票攏總訂滿，攏是beh趕轉去作兵的。伊轉飛去伊斯坦堡，準備轉機去以色列，等待9點鐘。真濟旅客陸續上機，干單伊無。航空公司地勤人員kā伊講，hiah-ê航班是「以色列人回國的緊急班機」。
以色列啟動徵召旅居國外的後備軍人回國，十月初八，以色列駐雅典大使館chhōa頭響應，訂20隻班機送以色列國籍後備軍人趕轉去祖國參戰。
十月十一新聞報導，美國紐約甘迺迪國際機場chit幾工出現一名神秘男子徛佇以色列國家航空櫃台附近，恬恬為收tio̍h以色列國防軍徵召通知回國的人買機票，機組人員講hit-ê人總共已經有買250張飛往以色列的機票。
愛國拼代先的以色列人，阮向恁行最敬禮！