十月十九，民進黨總統參選人賴清德召開「國家希望工程」記者會，發布能源轉型政策。會後主持人再三提醒猶有其他行程，賴清德講「無關係啦」，30分鐘hō͘媒體問kah飽。
記者問到柯文哲對深澳hiâⁿ土碳電廠的指控，柯文哲講，2018年賴清德擔任行政院長的時，bat親身去拜訪伊，拜託伊mài反對起深澳hiâⁿ土碳電廠，若無北台灣會欠電。柯文哲講伊當時相信賴清德，但是兩禮拜後，賴清德轉嘴講無beh起ah，批評賴清德無誠信。賴清德講，伊確實bat對柯文哲提起北部用電的困難，但是後來那會停建，過去佇行政院長任內備詢的時tio̍h有回應原因，因為民眾感受tio̍h空氣污染。若是經濟部有辦法調節北部電力的運用，行政院尊重。講賴清德bat親身去拜訪伊，賴清德反駁講，柯文哲tio̍h講清楚「我啥物時陣bat登門去拜訪伊？」顚倒是柯文哲bat為tio̍h chhōe副市長來台南拜訪我。針對柯文哲過去bat講「熱天賴清德會tàng穿西裝，坐kah足四正，食三點外鐘的飯，ùi頭到尾攏是坐90度，椅仔坐三分之一。」賴清德還原當時見面的經過，是柯文哲第一遍擔任台北市長的時，來台南beh chhōe總統府資政葉菊蘭，請託伊幫忙chhōe副市長，當時身為台南市長的我，自然陪同歡迎當時民進黨共同支持當選的柯文哲，賴清德說，hit遍見面，柯文哲mā問伊當選後tio̍h按怎解決專科醫師執照延續的問題，「佇hit種狀況下，我那有需要椅仔坐三分之一咧？」而且當時走公務行程中途前往，自然是穿西裝結ne-khú-tái。「歷史上bat聽過椅仔坐三分之一的，是李登輝前總統面對蔣經國前總統。但是我m̄是李登輝，Chit-má是民主時代，柯文哲mā m̄是蔣經國，mài想講家己是蔣經國。」賴清德講，kah柯文哲見面兩遍攏有公開轉述、柯文哲講的內容有kah事實無合。
原來是九月十四下晡，民眾黨主席柯文哲來到台中市清水參加市議員陳廷秀主辦的「選哲座談會」，柯文哲強調若是hō͘賴清德當選，台灣經濟會變差，mā會陷入戰爭危機。伊講2018年賴清德擔任行政院長的時，bat親身來拜訪伊，拜託mài反對起深澳電廠，若無北台灣會欠電，但是兩禮拜後賴清德轉嘴講無beh起ah。大罵賴清德的誠信不足。
台灣是一個自由民主的國家，每一個人攏有烏白眠夢的自由。歸頭殼「太監皇上」想法的柯文哲，真有可能眠夢tio̍h賴清德乖乖來朝見伊，椅仔坐三分之一。有人罵柯文哲講白賊、慣勢講白賊。有小可khah沈重。
咱顚倒相信：M̄是柯文哲講白賊，是伊眠夢kah現實分bē清楚！