人kah人之間是互相，你對我好，我mā對你好；我溫柔對待你，你mā仝款按呢對待我。厝邊頭尾mā是按呢，逐個攏希望厝邊和好。馬偕病院有出聲講：願意作你的好厝邊，有啥物身苦病疼免煩惱，來chhōe你的好厝邊—馬偕病院。咱台灣俗語話講得誠好：「徛厝tio̍h好厝邊，做田tio̍h好田邊。」若抵tio̍h一個歹厝邊一日到暗佇你的門口舞槌弄棍，實在真厭倦，你mā無伊法。親 像中國戰機、戰艦、汽球，會使講是曠（làng）時無曠日來台灣海峽中線附近擾亂，新正tio̍h派5隻次軍機、4台次軍艦來拜年！初五派21隻次軍機來，其中4隻次超越台灣海峽中線，派6台次軍艦來台海周邊活動，實在真可惡！
Koh khah可惡是：二月初一，中國民航局宣布，ùi即日起取消M503航路ùi北向南運行的措施，另外啟用M503航路W122、W123銜接航線ùi西向東運行。因為chit條航線距離「海峽中線」上近干單7.8公里，致使外界解讀中國chit-ê動作是存心beh kā「海峽中線」舞hō͘ phú-phú霧霧。而且中國啟用兩條ùi西向東銜接的航線，接近台灣飛往金門馬祖的航線，會影響tio̍h飛行安全。
中國孤旁宣布改變現狀，台灣當然kā看作是不友善的作為，經過咱國跨部會協商研議，決定對中國祭出反制。Tio̍h是原本交通部beh tī今年三月初一解除「禁團令」，開放咱國人民組團去中國旅遊。二月初七，交通部觀光署宣布，ùi即日起停止giú招去中國的旅行團。五月底前已經成團的，會tàng照計畫前往中國旅遊。六月初一起tio̍h無限期停團。交通部長王國材表示，設使中方開放團客過來，mā無koh有其他一系列的動作，會tàng趕緊kah台灣溝通M503航路，台灣得tio̍h回應了後，會對相關政策做後續的檢討。
咱知武漢肺炎爆發了後，台灣kah中國，攏tī 2020年一月底宣布ùi 二月初一開始暫停旅行業組團前往中國kah來台灣旅遊。2023年八月初十，中國宣布即日起恢復前往日本、韓國、美國、澳洲等78國的出境團隊旅遊，但是台灣無佇名單內底。意思是講，中國到taⁿ猶未恢復中國人組團來台灣旅遊。
二月初八，中國國台辦發言人朱鳳蓮批評講，民進黨以政治變弄旅遊，干單會hō͘台灣民眾kah旅遊業界不滿。借問一下，中國忽然間宣布改變M503航路運行方式，而且中國到chit陣mā猶未開放中國人組團來台灣旅遊，敢m̄是中國在先（tāi-seng）政治變弄？
人kah人之間的交陪，國kah國之間的來往，攏應該出佇真心誠意，親像台灣俗語話所講的：「有來有往，無來清爽！」無必要勉強。