權力是足迷人的。一個政治人物tio̍h經過幾十年的奮鬥拍拼，才有可能peh到全國上懸的地位，la̍k tio̍h全國上大的權力。權力一旦la̍k tio̍h，khah做mā bē夠氣。放bē掉！咱用俄羅總統浮丁kah中國國家主席習近平兩位作例來講。
俄羅的浮丁今年70歲，1999年頭一遍做總理，2000年第一次當選總統，2004年連任成功。2008年卸任後，擔任統一俄羅黨主席兼政府總理，Che代表伊繼續掌握國家實權。根據俄羅憲法，每屆總統極加會使連任一遍。2008年十一月，俄羅國會修改憲法，總統任期ùi 4年延長作6年。2012年浮丁第三次當選總統，2018年koh選tio̍h連任，任期六年，按呢，伊會使執政到2024年五月初七。2021年四月初五，浮丁簽署一項憲法修正案，kā已經有的總統當選次數攏歸零，ùi頭重新算起，准伊會使koh再參加兩屆的總統大選，也tio̍h是講浮丁若是總統做bē倦（siān），會使做到2036年、84歲才卸任。
中國領導者的產生，也tio̍h是「權力轉移」的方式，kah西方民主國家用民主選舉產生的方式完全無仝。早期是由激烈鬥爭產生的。一直到鄧小平才列出一個規矩，hō͘中共的菁英政治出現制度化、常規化的趨勢。確立「一代、兩任、十年」、「集體領導」、「隔代指定接班人」，kah「年齡劃線」chiah-ê原則。由7至9位政治局常任委員組成的「政治局常委會」做夥做決策。鄧小平kah一陣大老揀tio̍h江澤民、胡錦濤作接班人，隔代指定接班，而且hō͘ in確定的職責。幹部選任有一個重要原則是「七上八下」，佇換屆的時，67歲以下會使留任，68歲以上tio̍h退休。Chiah-ê原則目的真清楚，主要是為tio̍h防止再次出現一個大權獨攬的獨裁者，同時mā解決幹部老化的問題。
2007年，中共「十七大」甄補上海市委書記習近平、遼寧省委書記李克強、中央組織部長賀國強、公安部長周永康等4位新人進入政治局常委會，習近平、李克強兩人koh khah是hông看作是中共第五代領導班核心成員的培養人選。第五代領導核心tio̍h按呢出現，2017年，中共「十九大」無提出新人進入政治局常委會，人tio̍h知影習近平第十年國家領導者做了，會koh繼續落去做五年。2018年三月初五，全國人民代表大會修憲，取消國家主席連任限制。
今年中共「二十大」，已經七十一歲的習近平，mā無提拔年輕符合資格的領導者入去政治局常委會準備指定接班人，可見2027年，中共「二一大」mā是無準備接班人，習近平若做bē倦（siān），當然會繼續做到2036年，八十五歲。
權力la̍k tio̍h放bē掉！歸個接班人制度hō͘習近平破壞了了，中國政治會行倒退轉去一個大權獨攬的獨裁者、kah權力激烈鬥爭的時代，是中國的不幸!。 (221028)