三月二二暗，俄羅首都莫斯科近郊「番紅花大會堂」音樂廳遭受恐怖攻擊，造成重大傷亡，根據各國媒體kah社群平台發布的影像，會tàng看tio̍h至少有四名銃手佇出入口大廳開銃，音樂廳內底的群眾四界拚leh lōng，tòe銃聲響起來，是哀父叫母的哭聲。恐怖份子引爆手榴彈抑是汽油彈，致使場館火愈燒愈旺，火光、火燻chhèng上天。到三月二七早起，知影至少有143人死亡、360人輕重傷、140人失踨。十外年來俄羅上大的恐怖攻擊事件。
三月二四美國媒體指出，早早tī本月初七，美國駐俄羅大使館tio̍h公開警告，美方掌握有關莫斯科可能發生恐怖攻擊的情報，呼籲當地美國公民避免前往大型表演現場，而且事先有kah俄羅當局分享情報，但是俄羅總統浮丁m̄-nā無插伊，顚倒講是美方teh「起孔起榫」、「公然恐嚇，kah破壞咱社會穩定的意圖。」Chit-ê不幸的恐怖攻擊事件發生tī浮丁順利連任俄羅總統無一禮拜後，對否認美方情報的浮丁來講有啥物面子？
講tio̍h「恐怖攻擊」，俄羅總統浮丁應該tio̍h 隨時想起“ISIS”，因為俄羅kah in冤仇結誠深，m̄是初見面。2015年十月三十一，俄羅科加雷姆航空班機佇埃及西奈半島摔落，機頂224人全部死去，其中大部分是俄羅人，“ISIS”隨時大聲講是in做的，而且公開裝炸彈的相片。2017年四月初三，俄羅聖彼得堡地鐵發生炸彈爆炸，造成15人死亡、45人受傷，mā是kah激進伊斯蘭主義者有關。俄羅北高加索地區一直有武裝團體kah俄羅軍相戰，“ISIS”成立了後，chiah-ê武裝分子隨時走去敘利亞加入該恐怖組織，猶有真濟留佇北高加索活動的mā宣布效忠“ISIS”。聲明為chit遍恐怖攻擊事件負責的伊斯蘭國呼羅珊省分支“ISIS-K”是2015年創立的。“ISIS-K”早tio̍h kā俄羅當作修理的目標，經常批評俄羅總統浮丁，大罵克里姆林宮佇車臣kah敘利亞的軍事行動，猶koh有蘇聯時期入侵阿富汗時對穆斯林的暴行。“ISIS-K”認為俄羅是「慣勢壓迫穆斯林的共犯」。“ISIS-K”成員有包括一寡心中對俄羅不滿的中亞武裝分子。
Che tio̍h是獨裁者的傲慢。全世界的獨裁者攏仝款，認為家己上蓋gâu，任何無中意（tèng-ì）的話攏無愛聽。「恐怖攻擊」chiah呢要緊的代誌敢免加減參考預防？莫怪烏克蘭總統澤倫斯基批評浮丁，有時間派兵入侵烏克蘭，無閒工佇國內打擊恐怖主義。俄羅國內民眾質疑，為啥物俄羅官方干單會曉追蹤、去掠反對派人士，卻無法度預防銃手佇音樂廳內掃射？
Che tio̍h是獨裁者的悲哀！